Վենեսուելական բանտում ընդվզման հետևանքով 50 մարդ է զոհվել

Ինչպես տեղեկացնում են վենեսուելական ԶԼՄ-ները, ուրբաթ օրը Բարկիսիմետո քաղաքի մոտակայքում գտնվող բանտում ծայր առած ըմբոստությունների արդյունքում զոհվել է նվազագույնը 50, վիրավորվել՝ 90 մարդ:

Բարկիսիմետոյի կենտրոնական հոսպիտալի ղեկավարության տվյալներով՝ տուժածների մեծ մասը հրազենային վնասվածք է ստացել:

Զոհվածների թվում է 2 զինծառայող և բանտարկյալներին այցի եկած ավետարանչական քահանան: Եվս 15 զինվորական վիրավորվել է:

Ավելի վաղ հայտնի էր դարձել, որ ուրբաթ օրվա առավոտյան բանտում լսվել են կրակոցներ և նռնակի պայթյուն: Դրանք սկսվել են այն պահին, երբ բանտում ստըուգումներ են սկսվել բանտարկյալների մոտ եղած զենքն առգրավելու նպատակով: