Ընտրությունները ՀՀ բարդ իրավիճակում մեկնարկ են, ոչ թե քաղաքական գործընթացի ամփոփում. ռուս քաղաքագետ

Ադրբեջանական Salamnews գործակալությունը հարցազրույց է վերցրել ռուս քաղաքագետ, Север-Юг քաղաքագիտական կենտրոնի գործադիր տնօրեն Ալեքսեյ Վլասովից, ով իր հարցազրույցում անդրադարձել է Ղարաբաղյան հակամարտությանը, Հայաստանում սպասվելիք նախագահական ընտրություններին և ՀՀ սոցիալ-տնտեսական հարցերին:

Պատասխանելով լրագրողի այն հարցին, թե հնարավոր են արդյոք զարգացումներ այս տարի Ղարաբաղյան հակամարտության հարցում, քաղաքագետը պատասխանել է. «Ես բազմիցս նշել եմ, որ ելնելով Հայաստանում և Ադրբեջանում ընթացող զարգացումներից, ուր այս տարի նախագահական ընտրություններ են սպասվում, Ղարաբաղյան հակամարտության կարգավորման հարցում որևէ կտրուկ քայլերի սպասել պետք չէ: Դրան չի գնա ո՛չ պաշտոնական Երևանը, ո՛չ էլ Բաքուն: Ներկա 2013թ. Ղարաբաղյան հակամարտության բանակցային գործընթացում դադարի տարի է լինելու: Միայն 2014-ին կարելի է սպասել բանակցային գործընթացի ակտիվացում:

Լրագրողն անդրադարձել է նաև Հայաստանում սպասվելիք նախագահական ընտրություններին և հարցրել, թե հնարավոր է արդյոք կրկնվեն նախորդ ընտրությունների ժամանակ տեղի ունեցած բախումներն ու արնահեղությունները:

«Իրավիճակը Հայաստանում վերջին ժամանակներս որոշակիորեն փոխվել է այն առումով, որ Սարգսյանն այս ընտրություններում չունի ուժեղ հակառակորդներ ո՛չ երկրի ամենահարուստ և ազդեցիկ մարդկանց շարքից՝ ի դեմս ԲՀԿ առաջնորդ Գագիկ Ծառուկյանի, ո՛չ էլ ընդդիմության ներկայացուցիչների շարքերից՝ ի դեմս ՀԱԿ-ի:

Ինտրիգը նրանում է, թե կդնի արդյոք Գագիկ Ծառուկյանն իր թեկնածությունը ընտրություններին: Չնայած նույնիսկ այդ դեպքում էլ փորձագետներից ոչ ոք կասկած չուներ Սարգսյանի հաղթանակի վերաբերյալ, սակայն դա հնարավորություն կտար տեսնել նախագահական ընտրությունների երկրորդ փուլ: Այս դեպքում կնկատվեին որոշակի միտումներ հետագայում երկկուսակցական համակարգի անցնելու համար: Սակայն ԲՀԿ-ն, ինչ-ինչ պատճառներից ելնելով, դիմեց այդ քայլին՝ բացարձակ հեգեմոն դեր թողնելով ՀՀԿ-ին»,-ասել է Վլասովը և հավելել,-«Իսկ ինչ վերաբերում է Հայաստանի տնտըեսական վիճակին, ապա այստեղ տարբեր կարծիքներ են հնչում թե՛ Հայաստանի ներսում, թե՛ օտարերկրյա փորձագետների կողմից, ովքեր ուշադիր հետևում են երկրում սոցիալ-տնտեսական զարգացումներին: Ես կարծում եմ, որ իրավիճակը երկրում բավականին խրթին է: Դա վերաբերում է և արտագաղթի ցուցանիշներին և գործազրկությանը: Հիմնական խնդիրը բնակչության արտագաղթն է հենց ստեղծված ծանր սոցիալ-տնտեսական պայմանների պատճառով: Դրանք խնդիրներ են, որ ոչ մի տեղ չեն անհետանա, որոնք պետք է լուծվեն երկրի նոր նախագահի և այն իշխող վերնախավի կողմից, որն աստիճանաբար գալիս է իշխանության: Ընդ որում, Հայաստանում աստիճանաբար տեղի է ունենում այդ վերնախավի թարմացում: Դրանք արդեն այլ հայացքներով, այլ կրթություն ստացած մարդիկ են, ովքեր այլ տեսակետ ունեն Հայաստանի աշխարհաքաղաքական հեռանկարների հարցում: Այնպես որ, ընտրություններն այդ բարդ իրավիճակում միայն մեկնարկ են, այլ ոչ թե քաղաքական գործընթացի ամփոփում»: