Սիրելի Սրբազանը պահեցողության շրջանն անցկացնում է Տավուշի թեմից հեռու՝ ԱԱԾ մեկուսարանում. պատգամավոր

«Շուրջ 9 ամիս է, ինչ Բագրատ արքեպիսկոպոս Գալստանյանը անազատության մեջ է։ Սիրելի Սրբազանը պահեցողության շրջանն անցկացնում է Տավուշի թեմից հեռու՝ ԱԱԾ մեկուսարանում, հանապազօրյա աղոթքների և Սուրբ Գրքի ընթերցանությամբ»,-գրում է ԱԺ «Հայաստան» խմբակցության պատգամավոր Գառնիկ Դանիելյանը։

«Հերթական տեսակցության ժամանակ համոզվեցի, որ թեև Բագրատ Սրբազանը ֆիզիկապես մենակ է մնացել, բայց միայնակ չէ՝ մշտապես զգալով մեր հայրենակիցների սերն ու ջերմությունը։

Սրբազանն անընդունելի է համարում խափանման միջոց կալանքի փոփոխումը տնային կալանքով կամ այլ սահմանափակումներով՝ նշելով՝ կա’մ կալանավայր, կա’մ ամբողջական ազատագրություն։

Ակնհայտ է, որ իշխանությունները որևէ կերպ չեն կարողացել կոտրել կամ հիասթափեցնել մեր ժամանակների բացառիկ հոգևորականին․ ընդհակառակը, Սրբազանը սեփական օրինակով ցույց է տալիս, որ հալածանքներից միայն ուժեղանում է։

Առօրյա թոհուբոհի մեջ չմոռանանք անազատության մեջ հայտնված մեր եղբայրներին, այդ թվում՝ Բաքվի բանտերում ապօրինաբար պահվող։ Մեր աղոթքներն ուղղենք նրանց ազատությանն ու վերադարձին։

«Խնդրեցեք Աստծուց և կտրվի ձեզ, փնտրեցեք, և կգտնեք, բախեցեք, և կբացվի ձեզ համար, որովհետև, ով որ խնդրում է, առնում է, ով որ փնտրում է, գտնում է, և ով որ բախում է, բացվում է նրա առաջ»։

Ղուկաս 11:9-10»։