Հայկոն և Մկոն չեն բաժանվում

Այն մասին, որ «Կարգինի» տղաները՝ Հայկ Մարությանն ու Մկրտիչ Արզումանյանը, բաժանվում են, առաջին անգամը չէ, որ լսում ենք: Սակայն վերջերս տղաներն ավելի հաճախ են առանձին ներկայանում, ինչը կրկին տարատեսակ խոսակցությունների առիթ է տվել: Հիմա ի՞նչ, Հայկոն ու Մկոն իսկապե՞ս բաժանվում են, թե՞... Հարցի վերջնական պատասխանը ստանալու համար «Ժողովուրդ»-ի թղթակիցը դիմել է Մկրտիչ Արզումանյանին, որը պարզաբանել է.

«Մենք շատ երկար տարիներ միասին աշխատել ենք ու դեռ շատ բան ունենք միասին անելու: Պրոյեկտներ կան, որտեղ ես ինձ չեմ պատկերացնում, դրա համար էլ չեմ մասնակցում, եթե Հայկին հարմար է, ինքն է մասնակցում: Կլինեն տարբեր նախագծեր, որտեղ միայնակ հանդես կգանք' առանձին-առանձին, բայց դա չի նշանակում, որ մենք դադարել ենք միասին աշխատել»: Մկոն հերքել է նաև լուրերն այն մասին, որ իր և Հայկի միջև կոնֆլիկտ է ծագել.

«Ի՞նչ կոնֆլիկտ, նման բան չի եղել: Մենք շարունակելու ենք մեր համատեղ աշխատանքները, մոտ ապագայում էլ նոր ծրագրեր ունենք, որոնք կներկայացնենք: Ես կարծում եմ' նման խոսակցությունները սկսվեցին այն ժամանակ, երբ Հայկը մեր գործերով գնացել էր Ամերիկա: Հիմա Հայկն այստեղ է, ինչպես տեսնում եք, կրկին նկարահանվում ենք: Հավատացնում եմ' ոչ մի խնդիր չունենք»: