Վրաստանը կտրուկ ավելացրել է գինու արտահանումը Ռուսաստան

2026 թվականի փետրվարին վրացական գինու արտահանումը դեպի Ռուսաստան զգալի աճ է գրանցել։ Վրաստանի վիճակագրական ծառայության տվյալներով՝ մեկ ամսում մատակարարումների ծավալը հասել է 13,1 միլիոն դոլարի՝ աճելով շուրջ 63 տոկոսով հունվարի համեմատ և 44 տոկոսով՝ 2025-ի նույն ժամանակահատվածի նկատմամբ։

Ընդհանուր առմամբ, Վրաստանի գինու արտահանումը կազմել է մոտ 19,97 միլիոն դոլար՝ գրանցելով 64 տոկոս աճ ամսական կտրվածքով և 22 տոկոս՝ տարեկան։ Ռուսաստանը պահպանել է գլխավոր գնորդի դիրքը՝ զբաղեցնելով արտահանման 65,4 տոկոսը։ Հիմնական գործընկերների թվում են նաև Լեհաստանը (1,9 մլն դոլար), Ուկրաինան (1,01 մլն), Չինաստանը (մոտ 700 հազար) և Գերմանիան (ավելի քան 517 հազար դոլար)։

Միևնույն ժամանակ Ռուսաստանում գինու տեղական արտադրությունը կտրուկ նվազել է։ «Ռոսալկոհոլտաբակկոնտրոլ»-ի տվյալներով՝ հունվար-փետրվարին խաղողի գինիների արտադրությունը նվազել է 14,2 տոկոսով՝ հասնելով 4,4 միլիոն դեկալիտրի, փրփրուն գինիների արտադրությունը՝ 21,6 տոկոսով, իսկ լիկյորային գինիները՝ գրեթե 40 տոկոսով։