Ինչո՞ւ է Արմինկան ամեն տարի Դուբայում անցկացնում Ամանորը

Արդեն երեք տարի է՝ երգչուհի Արմինկան ընտանիքի հետ Ամանորն անցկացնում է ծովափնյա Դուբայում: Տոնն ընտանիքով տաք երկրում անցկացնելու համար երգչուհին իր պատճառներն ունի: Նրա խոսքերով՝ հոգնել է երևանյան ամանորներից ու Նոր տարվա վազքից: «Տարեվերջին՝ նոյեմբերին ու դեկտեմբերին, պարբերաբար համերգներ ու նկարահանումներ են լինում, իսկ Դուբայում ոչ միայն Ամանորն եմ նշում, այլև հանգստանում: Երգ ու պարով անցնող ամանորներից հոգնել եմ»,- esyes.am-ին պատմել է երգչուհին:

Ըստ Արմինկայի՝ կարևորը տոնի տրամադրություն ստեղծելն է, իսկ ինքը կարողանում է այնպես անել, որ ընտանիքի անդամները լիցքաթափվեն և իրենց ժամանակը ճիշտ օգտագործեն: Երգչուհին մայրիկի, քրոջ՝ Լուսինեի և որդու՝ Ալեքսի հետ Նոր տարին ազդարարող զանգերի ժամանակ հյուրանոցի համարում է եղել և 11-րդ հարկից հետևել է հրավառությանն ու տոնակատարություններին: Դա հատկապես փոքրիկ Ալեքսին է ուրախացրել: Նոր տարին դիմավորելուց հետո երգչուհու ընտանիքը Դուբայում բնակվող զարմիկների հետ ռեստորաններից մեկում նշել է Ամանորը:

Այս տարի Ձմեռ պապը շատ բարի է եղել ու Ալեքսին երկու անգամ այցելել:) Առաջին անգամ նա մինչ Դուբայ մեկնելն էր այցելել Ալեքսին ու իր պատվիրած մոտոցիկլը բերել: Երեխաների երազանքներն իրականացնող ծերունին, սակայն, մոռացել էր դրա հետ համապատասխան գլխարկ բերել: Այդ բացը լրացրել է Դուբայում հայտնված Ձմեռ պապն ու ուրախացրել փոքրիկին: Էմիրաթներում անցկացրած օրերի ընթացքում Ալեքսը հասցրել է լինել փոքրիկների ժամանցի վայրերում, սակայն նշել է, որ իր Երևանն է ուզում: «Որովհետև ես սիրում եմ հայերեն խոսել»,-մայրիկին իր դժգոհություն է հայտնել փոքրիկը: Եղել է նաև հակառակը, երբ Երևանում Ալեքսը մայրիկին խնդրել է Դուբայ գնալ: Մայրիկի խոսքերով, չնայած Ալեքսը ձմեռ սիրում է, սակայն իրեն շատ լավ է զգացել նաև Դուբայում, ծովն ու ջերմությունը գրավել են փոքրիկին:

Երգչուհին Դուբայում հասցրել է մի լավ հանգստանալ. «Պարզապես վայելում էինք հանգիստը՝ այցելելով հանգստի վայրեր, տարբեր երկրների բաղնիքներ, սպա կենտրոններ»:

esyes.am-ը ճշտել է նաև՝ արդյո՞ք ճիշտ են խոսակցությունները, որ Ամանորը Դուբայում անցկացնելը կապված է այնտեղ սիրելի անձնավորություն ունենալու հետ, ինչին ի պատասխան Արմինկան ասաց. «Դե մարդիկ պարզապես ենթադրություններ են անում, ոչ Դուբայում, ոչ էլ Երևանում սիրելի անձնավորություն չունեմ: Մեծ հաճույքով տոները նաև Դոմինիկյան հանրապետությունում կանցկացնեի, սակայն Դուբայը Հայաստանին մոտ է: Ընդամենը երեք ժամում հայտնվում ես տաք ու ծովափնյա երկրում, որտեղ ամեն բան քեզ ծանոթ է»: