Ռազմահայրենասիրական կրթությունը՝ ժամանակի մարտահրավեր

ՀՀ կրթության և գիտության նախարար Արմեն Աշոտյանն այսօր ներկա է գտնվել ՀՀ զինված ուժերի կազմավորման 21-րդ տարեդարձի կապակցությամբ ԵՊՀ-ում պաշտպանության նախարարության հրավիրած հաշվետու խորհրդակցությանը, որին մասնակցում էին նաև ոստիկանության, սպորտի և երիտասարդությոն հարցերի ու մշակույթի ոլորտի պատասխանատուները: Հանդիպման ընթացքում ամփոփվել են անցնող՝ 2012 թվականի ընթացքում ռազմահայրենասիրական կրթության և դաստիարակության ուղղությամբ գերատեսչությունների կողմից կատարած համատեղ աշխատանքները:

Բացման խոսքում ՀՀ պաշտպանության նախարար Սեյրան Օհանյանը նշել է, որ ավանդական միջոցառումը այս անգամ ՀՀ ԿԳ նախարար Ա. Աշոտյանի առաջարկությամբ կազմակերպվել է կրթական հաստատությունում, ինչը խորհրդանշում է, որ ռազմահայրենասիրական դաստիարակությունը կրթական համակարգի կարևոր գերակայություններից է: Այս համատեքստում Ս. Օհանյանը կարևորել է ՀՀ ՊՆ և ՀՀ ԿԳՆ համագործակցությունը ինչպես դպրոցներում աշակերտների, այնպես էլ բարձրագույն ուսումնական հաստատություններում ուսանողների ռազմահայրենասիրական դաստիարակության ամրապնդման գործում. «Համագործակցությունն ուսանողների և պրոֆեսորադասախոսական կազմի և դպրոցների հետ օրեցօր ավելի է ամրապնդվում: Մեր զինված ուժերի ամրության կարևորագույն նախապայմաններն են միասնականությունը, ուժերի հավաքումը, խելամիտ պաշտպանության կազմակերպումը»,- ողջունելով ներկաներին՝ նշել է ՀՀ ՊՆ նախարար Սեյրան Օհանյանը:

Իր խոսքում ՀՀ ԿԳ նախարար Արմեն Աշոտյանը շեշտել է, որ կրթության համակարգը այն կարևորագույն խողովակն է, որտեղ ռազմահայրենասիրական կրթությունը դառնում է իրողություն:

«Ռազմահայրենասիրական դաստիարակության խնդիրը կրթության համակարգում գնալով ավելի արդիական է դառնում, քանի որ նորագույն ժամանակներում պատերազմներն ընթանում են ոչ միայն զենքի, այլև գիտելիքի օգտագործմամբ: Մեր օրերում, երբ արտաքին տեղեկատվական և մշակութային հոսքերի ամենօրա հարձակումները հասարակական մարտահրավեր են դարձել, կրկնակի կարևորություն է ստանում երիտասարդ սերնդի կողմից գիտելիքների ու արժեքների համադրումը, որը կարող է պետության համար ռազմավարական նպատակ դառնալ: Շատ կարևոր է, որ Հայաստանի երիտասարդ սերունդն իր մեջ կրի պետական և ազգային շահի արժեհամակարգը: Համոզված եմ՝ մեր հարուստ պատմությունն ու մշակույթը հայ երիտասարդին դաստիարակելու լավագույն պարարտ հողն են»,- իր խոսքում նշել է Ա. Աշոտյանը: Այնուհետև ներկայցվել են գերատեսչությունների կողմից նախորդ տարվա ընթացքում ոլորտում կատարված աշխատանքների հաշվետվությունները:

Խորհրդակցության ավարտին ՀՀ զինված ուժերի կազմավորման 21-րդ տարեդարձի կապակցությամբ կրթության և գիտության, մշակույթի, սպորտի և երիտասարդության, պաշտպանության և ոստիկանության ոլորտների մի շարք ներկայացուցիչներ արժանացել են գերատեսչական պարգևների: