Ո՞վ է «Գեներալի աղջկա» մայրն իրականում

Դերասանուհի, ռեժիսոր Աննա Էլբակյանը ծնվել է 1963թ. սեպտեմբերի 5-ին, Երևանում: Արձակագիր, հոգեբան Էլդա Գրինի դուստրն է և դերասան, բեմադրիչ Արմեն Էլբակյանի կինը:

1982թ. ավարտել է Երևանի Սունդուկյանի անվան ազգային ակադեմիական թատրոնին կից դրամատիկական ստուդիան և աշխատանքի է ընդունվել որպես դերասանուհի: 1986թ. ավարտել է Երևանի պետական համալսարանի արվեստագիտական ֆակուլտետը: Առաջին քայլերը բեմում արել է 17 տարեկանում՝ խաղալով Էլզիի դերը Սարոյանի «Ձեր կյանքի ժամանակը» ներկայացման մեջ, հետագայում՝ Բայբա՝ Ռայնիսի «Փչիր քամիում», Վալյա՝ Հարությունյանի «Հարսնացուն հյուսիսից», Ֆանշեթ՝ Բոմարշեի «Ֆիգարոյի ամուսնություն», Լյալյա՝ Ռազումովսկայի «Սիրելի Ելենա Սերգեևնա»:

Նկարահանվել է բազմաթիվ հեռուստաներկայացումներում և մի շարք գեղարվեստական ֆիլմերում՝ «Որտեղ էիր մարդ Աստծո», «Սպիտակ ոսկոռ», «Գողը», «Դեմքով դեպի պատը», «Ուրվագիծ», «Երևան ջան», «Էլեգիյա» և այլն: 1998-2003թթ աշխատել է Երևանի Սունդուկյանի անվան ազգային ակադեմիական, 1991-94թթ՝ «Մետրո», 1994-98թթ՝ Երևանի պետական Համազգային թատրոններում: 2000թ-ից աշխատում է Էդգար Էլբակյանի անվան դրամայի և կոմեդիայի թատրոնում:

Մասնակցել է բազմաթիվ միջազգային փառատոների, հյուրախաղերով հանդես է եկել արտերկրում: 2005թ-ից Երևանի պետական Խամաճիկների թատրոնի գլխավոր ռեժիսորն է: Հանդիսանում է Հայաստանի Թատերական և Կինոգործիչների միության անդամ: Խաղացել է մի շարք հեռուստաներկայացումներում:

2005թ., 2006թ. և 2008թ. արժանացել է «Արտավազդ» ամենամյա թատերական մրցանակի: 2001թ. արժանացել է ՀՀ մշակույթի նախարարության ոսկե մեդալի, 2006թ.՝ «Տարվա լավագույն դերասանուհի», 2007թ.՝ ՀՀ վաստակավոր արտիստի կոչմանը: 2012թ. արժանացել է «Հայակ» հայկական ամենամյա առաջին կինոմրցանակաբաշխության «Լավագույն դերասանուհի» մրցանակին:

Նյութը՝ slaq.am-ի: