«Թումոն» իր դռներն է բացում Դիլիջանի պատանիների համար

Դիլիջան քաղաքում մեկնարկում է «Թումո» կենտրոնի ծրագիրը: «Թումո Դիլիջանը» հագեցած է 29 համակարգչով և հնարավորություն ունի օրական ընդունել մինչև 90 պատանու՝ տրամադրելով նրանց յուրատեսակ ուսումնական փորձառություն նոր տեխնոլոգիաների կիրառմամբ:

Արդեն հունվարի 29-ից թվային տեխնոլոգիաներով հետաքրքրված բոլոր 12-16 տարեկան դիլիջանցիները կարող են այցելել «Թումո» գրանցվելու համար: Ուսուցումը «Թումոյում» անվճար է:

Ուսուցանող մարզիչների և հմուտ մեդիա մասնագետների ուղորդմամբ դիլիջանցի պատանիները հատուկ մշակված «Թումո» ուսումնական ծրագրի միջոցով կբացահայտեն և կուսումնասիրեն չորս հեռանկարային ոլորտներ՝ թվային մեդիա, խաղերի ստեղծում, անիմացիա, կայքերի մշակում: Միաժամանակ աշխատելով իրական նախագծերի վրա՝ պատանիները կհմտանան իրենց նախընտրած ոլորտներում, ձեռք կբերեն թիմային աշխատանքի և հաղորդակցման հմտություններ, կձևավորեն վերլուծական մտածելակերպ, կզարգացնեն նախաձեռնողական կարողություններ: Հրավիրված օտարերկրյա և տեղացի մասնագետների հետ հանդիպումներն ու դասընթացները պատանիներին հնարավորություն կընձեռեն զարգացնելու իրենց գիտելիքները: Արդեն մարտ ամսից «Թումո Դիլիջանում» կգործեն ռոբոտաշինության և համակարգչային երաժշտության հատուկ դասընթացներ:

Հավելենք, որ 2011թ. ամռանը Երևանում բացվեց «Թումո» ստեղծարար տեխնոլոգիաների կենտրոնը: Այն ստեղծվել է Սիմոնյան կրթական հիմնադրամի նախաձեռնությամբ: «Թումո» կենտրոնի նպատակն է հայ պատանիներին ընձեռել լավագույն հնարավորություններ ակտիվ և հետաքրքիր ուսումնառության համար, որն էլ կնպաստի նրանց ստեղծագործական ինքնազարգացմանն ու դրսևորմանը: