«Հայաստանի ձայնից» Նարեկը՝ շոուբիզնեսի «փորով» տղաների մասին

«Հայաստանի ձայնը» մրցույթից հանդիսատեսին առավել հայտնի դարձած Նարեկ Մակարյանը նկարահանել է իր առաջին տեսահոլովակն «Անձրև» երգի հիման վրա: Երգի երաժշտության հեղինակն Արամ Սաթյանն է, խոսքերինը՝ Կարո Վարդանյանը, իսկ գործիքավորումն արել է Վահան Նահապետյանը: Տեսահոլովակի ռեժիսորը Սերժ Գաբյանն է, ում հետ համագործակցությունը, Նարեկի փոխանցմամբ, շատ հաճելի էր:

Նարեկը երգում է տասը տարեկանից. երգել է «Դո-ռե-մի» մանկապատանեկան խմբում: «Առնո Բաբաջանյան» միջազգային մրցույթի հաղթող է եղել, իսկ 2011-ին Հայաստանը ներկայացրել է «Սլավիանսկի բազարին» և չորրորդ տեղը զբաղեցրել: Այժմ նա սովորում է Կոնսերվատորիայի ջազ-վոկալ բաժնում, մագիստրատուրայի առաջին կուրսում:

Նարեկից հետաքրքրվեցինք, արդյո՞ք «Հայաստանը ձայնը» մրցույթին մասնակցելու ընթացքում տեսահոլովակը նկարահանելը չի հակասում մրցույթի կանոնակարգին, նա էլ ասաց՝ ոչ: Նարեկը խոստովանում է, որ «Հայաստանի ձայնին» մասնակցելուց հետո իրեն ավելի շատ են սկսել ճանաչել: «Այս մրցույթը մեծ ճանաչում է բերում: Մարդիկ ավելի են սկսում հետաքրքրվել»,- ասաց երգիչն ու հավելեց, որ մրցույթի մասնակցելիս, բնականաբար, նպատակը հաղթելն է, սակայն նույնիսկ չհաղթելու դեպքում դա մեծ դպրոց էր:

«Անձրև» երգն ունի 2 տարբերակ՝ դասական և մոդեռն: Նարեկը որոշել է տեսահոլովակ նկարահանել մոդեռն տարբերակի հիման վրա: 20-ամյա երիտասարդը ցանկություն ունի ցույց տալու՝ ինչ հարուստ մշակույթ ունենք հայերս՝ նորովի ներկայացնելով մեր երաժշտությունը: «Որոշեցի նորովի մատուցել այս երգը, որը 1 տարի առաջ Արամն ինձ համար է գրել: Մենք շատ լավ երաժշտություն ունենք, որն այսօր մոռացության է մատնվում: Ուզում եմ իմ երաժշտությամբ վերադառնալ մեր արմատներին: Շատ ցավալի երևույթ է, որ հայ երիտասարդները չգիտեն, օրինակ, Կոմիտասին»,- esyes.am-ի հետ զրույցում ասաց Նարեկը:

Երգիչը պատմեց, որ մտավախություն ուներ որպես նորեկ «վրաերթի» ենթարկվելու, քանի որ հնարավոր է՝ հայկական հեռուստաընկերությունները իրենից գումար պահանջեին տեսահոլովակը ցուցադրելու համար, սակայն հուրախություն երգչի, նման խնդիր չի եղել: Երգն արժանացել է հեռուսատաընկերությունների հավանությանն ու վերջիններս համաձայնել են անվճար ցուցադրել այն: «Ինձ համար «պրինցիպ» է, որ չվճարեմ մի բանի համար, ինչը ես լավ աշխատանք եմ համարում»,- նշեց երգիչը:

Մարտին Նարեկը նոր տեսահոլովակ կունենա՝ ԴերՀովայի հետ համագործակցության արդյունքում ծնված երգի հիման վրա: Ըստ երգչի՝ այն ռիթմիկ, հիթային գործ է, որի երաժշտության հեղինակներն ինքն ու ԴերՀովան են, խոսքերը գրել է նույն երաժշտական նախագծում Նարեկի հետ հանդես եկող Գրիգոր Կյոկչյանը:

Նարեկի փոխանցմամբ՝ ինքը ցանկություն ունի նոր որակ բերել շոուբիզնես՝ կերպարի վրա աշխատելու առումով: Ըստ նրա՝ շատ վատ է, որ մեր շոուբիզնեսցիները սպորտով չեն զբաղվում և, ինչպես ինքը նշեց, հաճախ բեմ են բարձրանում «փորով» տղաներ:

Նյութը՝ esyes.am -ի