Դադարեցրեք Մինասյան եղբայրների դեմ կարված քաղաքական հաշվեհարդարը. Հարություն Աղա-Սարգսյան

Հայոց եկեղեցու պահպանության համահայկական խորհրդի նախագահ Հարություն Աղա-Սարգսյանը հանդես է եկել հայտարարությամբ՝ անդրադառնալով դպրոցահասակ Դավիթ և Միքայել Մինասյանների դեմ իրականացվող ապօրինի հետապնդումներին։

Հայտարարության մեջ ասվում է.

«Հայաստանի օրվա իշխանությունները հիվանդագին մոլուցքով, նպատակաուղղված և անթաքույց կերպով երկիրը գլորում են դեպի ներքին արյունահեղություն, հոգևոր սպանդ և բարոյական հատակ։

Այն, ինչ այսօր արվում է Հայ Առաքելական Սուրբ Եկեղեցու, Ամենայն Հայոց Վեհափառի և Եկեղեցու կողքին կանգնած յուրաքանչյուր հայ մարդու դեմ, պետական լծակներով զինված վախկոտների բացահայտ ահաբեկչություն է։

Միքայել և Դավիթ Մինասյան եղբայրների դեմ սանձազերծված հաշվեհարդարը այս պետական խուլիգանության ամենազզվելի դրսևորումներից է։ Երբ շինծու, եկեղեցական միջավայրում տեղի ունեցած միջադեպի անվան տակ թիրախավորվում են դպրոցահասակ երիտասարդներ, երբ նրանցից մեկը ցուցադրաբար գցվում է բանտ՝ ունենալով առողջական խնդիրներ, սա կեղտոտ վենդետա է և հասարակությանը սարսափեցնելու էժանագին փորձ՝ սնուցված հակաեկեղեցական կատաղի ատելությամբ։ Պետությունը որպես դահիճ օգտագործելը՝ հիվանդ երիտասարդների կյանքի հաշվին քաղաքական մեսիջներ հղելու և հավատացյալներին վախեցնելու համար, բարոյական այլասերման գագաթնակետն է։

Ով ձեռք է բարձրացնում Մայր Աթոռի վրա, ով պետական ապարատը ծառայեցնում է եկեղեցատյացությանը և ով խեղում է երիտասարդների ճակատագրերը՝ դա անելով հանուն օրվա իշխանության պահպանման, նա ուղիղ հարվածում է Հայաստանի պետականության ողնաշարին։ Սա սխալ չէ, սա գիտակցված ազգադավություն է։

Մենք խստագույնս պահանջում ենք անհապաղ և առանց պայմանների վերջ տալ Եկեղեցու և նրա հետևորդների նկատմամբ պետական մակարդակով հրահրվող ատելությանն ու ահաբեկումներին, դադարեցնել Մինասյան եղբայրների դեմ կարված քաղաքական հաշվեհարդարը, ապահովել արդարություն՝ անվերապահորեն հաշվի առնելով նրանց առողջական ծանր վիճակն ու մարդկային տարրական իրավունքները, դադարեցնել ազգը պառակտելու, երիտասարդների ճակատագրերի հետ խաղալու և երկիրը հոգևոր խավարի բանտի վերածելու արատավոր ուղին։

Ոչ մի ժամանակավոր իշխանություն իրավունք չունի իր աթոռը վեր դասել ազգի դարավոր սրբություններից ու քաղաքացու կյանքից։ Հայ ժողովուրդը չի հանդուրժելու, որ վախը դառնա կառավարման գործիք։ Հայոց եկեղեցու պահպանության համահայկական խորհուրդը ամենայն կոշտությամբ պայքար է մղելու ցանկացած ոտնձգության դեմ, որն ուղղված է մեր հավատքի, մեր Եկեղեցու և մեր հայրենակիցների կյանքի ու արժանապատվության դեմ»։