«Դժվար ապրուստ» սերիալից Դավիթը զորացրվելիս չէր ուզում վերադառնալ տուն

Այսօր Հայաստանը տոնում է Հայոց բանակի օրը: «Դժվար ապրուստ» հեռուստասերիալի դերասաններից Դավիթ Մարդյանը, ում հեռուստադիտողը ճանաչում է որպես Ստյոպա, 2008-2010 թվականներին ծառայել է հայոց բանակում:

Lurer.com-ը Հայոց բանակի 21 ամյակի առթիվ զրուցեց դերասանի հետ: Այն հարցին, թե որտեղ է անցկացրել ծառայությունը, Դավիթն ասաց՝ ռազմական գաղտնիք է: Այդուամենայնիվ դերասանը խոստովանեց, որ մինչև զորակոչվելը խուսափել է բանակում ծառայելուց.

-Անկեղծ ասած՝ մինչև բանակ գնալս շատ էի ուզում ազատվել ծառայությունից, բայց գնալուց մոտ 3 ամիս առաջ մտափոխվեցի: Եվ հետո, երբ հնարավորություն կար ազատվելու բանակում ծառայելուց, հրաժարվեցի այդ հնարավորությունից. հստակ որոշել էի՝ պետք է ծառայեմ:

Ինչպես պարզվեց, Դավիթի որոշումը պատճառ է ունեցել.

-Որոշմանս մեջ մեծ դեր կատարեց Արցախյան պատերազմում կռված մի մարդու հետ զրույցը, որը 180 աստիճանով մտափոխեց ինձ: Եվ ես հաճույքով գնացի ծառայելու՝ նախ Երևանից 180, ապա՝ 120 կմ հեռավորության վրա:

Ծառայությունից դերասանը «դատարկաձեռն» չի վերադարձել.

-Երկու տարիներն այնքան շատ բան են տվել ինձ: Դիպուկահար եմ եղել, ինչի շնորհիվ հիմա շատ լավ կրակում եմ: Իսկ ամենակարևոր ձեռքբերումս, իհարկե, ընկերներս են: Նաև հիշում եմ զենքիս համարը, բայց չեմ ասի (ծիծաղում է...):

-Իսկ դժվար, վտանգավոր իրավիճակներից հուշեր ունե՞ք։

-Ամենամեծ դժվարությունն իմ ծառայության ընթացքում առաջին 2-3 ամիսն էր, ինչը, կարծում եմ, բնական է. դու կտրվում ես քո առօրյայից, ազատությունդ դառնում է սահմանափակ: Այդ ժամանակ սկսում ես ընկճվել: Հետո անցնում է այդ ամենը:

Խոստովանեմ, որ զորացրվելիս անգամ չէի ուզում տուն գալ:

-Ըստ Ձեզ՝ տեղի՞ն է այն միտքը, որ տղան տղամարդ է դառնում հենց բանակում:

-Տղամարդ դառնալը հարաբերական է ասված: Համենայն դեպս, ես նկատում եմ հստակ փոփոխություններ իմ մեջ: Ծառայության հետևանքով ավելի ինքնուրույն եմ դարձել, ավելի հասուն: Էական փոփոխություն նկատում եմ թե՛ իմ բնավորության, թե՛ իմ որոշումների մեջ, ինչը վկայում է այն մասին, որ բանակը դրական փոփոխությունների է ենթարկել ինձ:

-Ձեր շնորհավորանքը...

-Շնորհավորում եմ բոլոր զինծառայողներին, նրանց, ովքեր այս պահին գտնվում են ծառայության մեջ: Մաղթում եմ նրանց բարի, անփորձանք ծառայություն և զորացրում: Կապույտ երկինք՝ մեզ բոլորիս: Գիտեմ, վստահ եմ, որ հարկ եղած ժամանակ յուրաքանչյուր հայ տղա՝ առանց բացառության, իր հայրենիքի մեկ քառակուսի մետր հողի համար էլ կպայքարի ու իր կյանքը կտա: Թող մեր զենքերն առիթ չունենան կրակելու, իսկ եթե այնուամենայնիվ առիթ լինի, ոչ մի փամփուշտ իզուր չկորի:

Lurer.com-ը շնորհավորում է Դավիթին և բոլոր նրանց, ովքեր ծառայել, ծառայում և դեռ ծառայելու են հանուն մեր հայրենիքի: Շնորհավո՛ր տոնդ, հա՛յ զինվոր:

Զրուցեց Ռուբինա Հակոբյանը
Լուսանկարները՝ Դավիթի անձնական արխիվից

{gallery}622{/gallery}