Ես վերադառնում եմ. Լուիզա Ղամբարյան (տեսանյութ, լուսանկարներ)

Հասարակություն 28 Հունվար, 2013 22:36

Հրաչյա Ղափլանյանի անվան դրամատիկական թատրոնի հայտնի դերասանուհի Լուիզա Ղամբարյանը սերիալասեր հասարակությանը հայտնի դարձավ դեռևս 2007-ին նկարահանված «Դժբախտ երջանկություն» հեռուստանովելից: 5 տարի շարունակ Լուիզան հեռուստադիտողներին «ստիպում էր» ուրախանալ, տխրել, հուզվել իր կերպարներով:

Մոտ մեկ տարի Լուիզան էկրաններին չերևաց: Այսօր արդեն տեղյակ ենք, որ դերասանուհին նկարահանվում է «Արմենիա» հեռուստաընկերությամբ հունվարի 28-ից ցուցադրվելիք «Ընտրյալները» հեռուստասերիալում:

Լուրեր.com-ի զրուցակիցն է դերասանուհի Լուիզա Ղամբարյանը:

-Դուք առաջին հայ դերասանուհիներից մեկն էիք, ով համարձակվեց նկարահանվել հեռուստասերիալում: Ի՞նչ սպասելիքներ ունեիք, և իրականացա՞ն արդյոք դրանք:

-«Դժբախտ երջանկություն» հեռուստանովելը հայկական սերիալային արտադրության առաջին սերիալն է, նկարահանվել է 2007-ին և ցուցադրվել «Արմենիա TV»-ով:

Անշուշտ կար մտավախություն, կային օտար վախեր, կային արհեստածին բարդույթներ, քանի որ ես դերասանական, թատերական անցյալ և ներկա ունեցող դերասանուհի էի, պատահական աղջիկ չէի, ում ուղղակի արտաքինը հավանելով՝ բերեցին և առաջարկեցին նկարահանվել: Ես մի արվեստագետ էի, ով իր ետևում ուներ բավական լուրջ անցյալ:

Իմ սպասելիքներն արդարացան, որովհետև ժամանակը ցույց տվեց, որ «Դժբախտ երջանկությունը» ունեցավ այն ժամանակվա համար աննախադեպ հաջողություն, որովհետև առաջինն էր, որովհետև բարի էր, որովհետև կար սիրո պատմություն, կրիմինալը քիչ էր, ի վերջո առաջինն էր, մարդիկ սկսեցին սիրել, հուզվել, մեր հերոսների հետ:

2-2.5 տարի տևեցին իմ՝ «Աննայի» մաքառումներին, որից հետո հաջորդ քայլը, ըստ տրամաբանության, գնալու էր նրան, որ պետք է լիներ ավելի բարձրակարգ նախագիծ, որտեղ խաղային, իհարկե, ավելի պրոֆեսիոնալ դեմքեր, ովքեր իրենց ուսերի ետևում թողել են մեծ անցյալ՝ թատերական և սցենարական իմաստով, հետևաբար, պետք է լիներ հզոր մի բան: Դա եղավ: Դա «Վերադարձ» հեռուստանովելն էր: Իհարկե, օբյեկտիվ վերլուծություններից հետո ես կարող եմ փաստել, որ «Վերադարձ»-ը հայկական բոլոր հեռուստասերիալներից առանձնանում էր:

Կան շատ հաջողված սերիալներ, կան ֆենոմեն ունեցող սերիալներ, որոնք լավը չեն, բայց ունեն մեծ դիտելիություն: Կան սերիալներ, որոնք իսկապես լավն են, բայց «Վերադարձ»-ը կես քայլով մոտ էր կինոյին:

«Վերադարձ»-ին հաջորդեց «Կյանքի գին 2»-ը, որը, ըստ իս, իր հաջողությամբ մեծ չափով զիջեց «Կյանքի գին» առաջինին, քանի որ առաջինը փայլուն մի սերիալ էր, որտեղ ես երազում էի խաղալ, բայց այդ ժամանակ նկարահանվում էի մեկ այլ սերիալում: Եթե լինենք անկեղծ, երկրորդը զիջեց առաջինին:

Իմ սերիալային գործունեությունը տևեց հինգ տարի, ինչից հետո ես սեղմեցի դադարի սեղմակը:

-Տևական ժամանակ էր՝ չէիք նկարահանվում հեռուստասերիալներում: Ինչո՞վ էր պայմանավորված այս դադարը:

-Իմ կարծիքով յուրաքանչյուր մարդ, ով ինչ-որ մի բան է ձեռք բերում, պետք է կարողանա գնահատել այն, ինչ ձեռք է բերել, որովհետև շատ հեշտ է կորցնելը, հեղինակազրկվելը, երբ քո արածը կհավասարեցնես ինչ-որ մի բանի, ինչը կարող է անել, ցանկացած մարդ:

Երբ ես հասկացա, որ սկսում եմ կրկնվել, իսկ դա տիպիկ է յուրաքանչյուր մահկանացուի, ես որոշեցի դադար տալ, որովհետև լինելով ամեն օր հեռուստասերիալում՝ դու չես կարող միշտ լինել և՛ գեղեցիկ, և՛ շնորհքով, և՛ սեքսուալ, և՛ հմայիչ, և՛ տաղանդավոր: Դու պետք է կարողանաս կառավարել քո և հանդիսատեսի կապը:

Ես դադար վերցրեցի նաև նրա համար, որ այն, ինչ ես ձեռք էի բերել ժամանակի ընթացքում, պետք էր պահպանել: Ես կարծում եմ, որ շատ քիչ էր մնացել, որ դառնայի հերթական մի աղջնակ, ով նկարահանվում է սերիալում: Իսկ ես իմ ինքնագնահատականը գիտեմ և դա գերագնահատական չէ, ոչ էլ թերարժեքության բարդույթ է: Երբ հասկացա, որ կարող է դառնամ հերթական մի աղջիկ, ով, այս սերիալից այն սերիալն է թռչկոտում, ով այս սերիալի կերպարից պարզապես ոչ մի դերասանական աշխատանք չտանելով, անցնում է մյուս սերիալին, ես դադար տվեցի:

-Այժմ նկարահանվում եք «Ընտրյալներ» հեռուստասերիալում: Ո՞ւմ կողմից ստացաք հրավերը:

-Ես առաջարկ ստացա Serial production-ից, որը նկարահանում էր հեռուստասերիալ ԱրմենիաTV-ի պատվերով: Այսինքն երկու կազմակերպություններ, որոնք ինձ համար շատ թանկ են: Ծանոթացա սցենարի կառուցվածքի հետ և բնականաբար, չմերժեցի:

-Ո՞ւմ կերպարն եք մարմնավորում:

-Կերպարիս մասին կարող եմ ասել, որ կենտրոնական կանացի կերպար է, հերոսուհի՝ ում մոտ ամեն ինչ լավ է ամենասկզբում: Ունի ընտանիք՝ սիրող ամուսին, հրաշալի բալիկ, բայց հանկարծ մի վայրկյանում, դաժան մարդկանց պատճառով, ամենաթողության հետևանքով ամեն ինչ կորցնում է:

Ամուսնուն սպանում են, կինը հայտնվում է ոչ միայն անօգնական վիճակում՝ իբրև կին, որը կորցնում է իր սիրելի ամուսնուն, այլ նաև որպես մայր. նա սկսում է ապրուստի միջոցներ գտնել իր երեխայի համար և դրան զուգահեռ նա սկսում է պայքարել, փորձում է հասկանալ, թե ով է կանգնած իր դժբախտության ետևում, ով է սպանել և այդ ընթացքում մտածում վրեժի մասին:

-Կպատմե՞ք դերասանական կազմի մասին:

-Հպարտորեն և ուրախանալով՝ ուզում եմ ասել, որ մեր գործում շատ կարևոր է, թե ով է քո խաղընկերը, եթե դու քեզնից ներկայացնում ես որևէ արժեք, որպես գործի մարդ, ապա քո արժեքը կարող է դառնալ գետնին հավասար: Դու կարող ես արժեզրկվել, եթե քո դիմացինը պրոֆեսիոնալ չէ, եթե քո դիմացինը չի հասկանում ձեր գործից: Մեր գործում պետք է հասկանալ, թե ինչ կա չասված բառերի արանքում:

«Ընտրյալներ» հեռուստասերիալում ես պատիվ ունեմ խաղալու Սամվել Սարգսյանի հետ, ով հանդիսացել է իմ Բարխուդարովը «Կյանքի գին» հեռուստասերիալում, իսկ «Վերադարձ»-ում Սեդրակը՝ ամուսինս, Հարություն Խաչատրյանը, ով բավական հայտնի է սերիալասեր հասարակության համար, սերիալում նկարահանվում է նաև Սունդուկյանի մեր լավ դերասաններից իմ շատ սիրելի Էվելինա Շահիրյանը, ում հետ մենք նաև նույն թատրոնում ենք խաղացել, Ջուլիետա Ստեփանյանը՝ հետաքրքիր գույներով դերասանուհի, ով այս սերիալում իր՝ ուրիշ գույներով կներկայանա, որովհետև շատ հզոր դերասանուհի է՝ թե՛ կոմիկական, թե՛ տրագիկ ժանրերում, իր ամուսինը՝ Սամվել Բաղինյանը: Եվ իհարկե, երիտասարդ դերասաններից կարող եմ ասել Արտաշես Մխիթարյանի մասին, ով էլի Դրամատիկական թատրոնի խոստումնալից, առաջատար և շատ հետաքրքիր շնորքով տղա է:

-Նկարահումներին զուգահեռ շարունակե՞լու եք խաղալ թատրոնում:

-Անշուշտ: Կարող եմ ասել նաև, որ սերիալի նկարահանումներն են զուգորդվելու թատրոնի հիմնական աշխատանքի հետ:

-Ընտանիք, կինո, թատրոն, ինչպե՞ս եք համատեղում:

-Կինը ամենազորեղ մի երևույթ է: Կինը, եթե ունենա ստիմուլ, եթե ունենա ցանկություն, ապա կկարողանա սարեր շուռ տալ, եթե այդ սարերն ուզում են, որ իրենց շուռ տան: Իմ տանը, իմ ընտանիքում ես ունեմ համախոհներ, ես ունեմ ամուսին, ով ինձ չի խանգարում. նա ինձ օգնում է: Ես ունեմ մայր, ով իմ բալիկի ծնված օրվանից, արել է այնպես, որ ես միայնակ չկրեմ մայր լինելու հաճելի հոգսերը, նաև կարողանամ զբաղվել իմ անձնական կարիերայով, կարողնամ շփվել իմ ընկեր-ընկերուհիների հետ, մի խոսքով՝ մայր, ամուսին: Թատրոնն ամեն ինչ անում է, որ հարմարեցնի. սերիալային ինդուստրիայում նույնպես ես ունեմ գաղափարախոսական մի թիմ, ովքեր երբեք չեն խանգարում: Դրա համար էլ ես կարողանում եմ համատեղել մեկը՝ մյուսի հաշվին չանելով:

Ես վերադառնում եմ իմ շատ սիրելի հեռուստաշուկան, վերադառնում եմ կարոտած: Ես չեմ սիրում չափազանցնել, բայց ես գիտեմ, որ ով լինում է հեռուստատեսությունում, գիտի, որ ունենում է և՛ իրեն սիրողներ, և՛ չսիրողներ: Բայց ես գիտեմ, որ այն լսարանը, ով ինձ սիրում է, շատ բարձրակարգ լսարան է, որի համար ես շատ ուրախ եմ: