Աննա Գրիգորյանը` սիրելիի հետ հարաբերությունները խզելու մասին

«Աննա Գրիգորյանի սիրտը զբաղված է և «Ես»-ը դեռ չի՞ գրել այդ մասին»,- զարմացած գրել էր մեր ընթերցողներից մեկը: Հաղորդավարուհու` ընտրյալ ունենալու մասին վերջին շրջանում մեր ընթերցողները հաճախ էին հարցնում, ինչի առիթով զանգահարեցինք Աննային' ճշտելու լուրերի իսկությունը:

Հաղորդավարուհու հետ շատ անկեղծ զրույց ունեցանք: Պարզվում է` Աննայի սիրտն իսկապես զբաղված է, սակայն նա ընկեր չունի: «Ես ընկերություն չեմ անում այդ մարդու հետ, ուղղակի սիրտս զբաղված է: Եղել են հարաբերություններ, հիմա ավարտվել են, քանի որ չստացվեց… Հիմա ես մենակ եմ, բայց սիրում եմ նրան, ուղղակի չհասկացանք իրար: Էստեղ արդեն առաջ է գալիս բնավորությունների բախումը ու պետք է շատ ուժեղ լինել: Ես չեմ ուզում մեղադրել ինչ-որ մեկին, միշտ էլ երկու կողմերն են մեղավոր լինում, բայց այս դեպքում հակված եմ, որ ես իմ էությամբ ավելի պայքարող եմ ու ավելի շատ բան կարող եմ զոհել ու անել հանուն սիրո: Սերն ինքնին պայքար է ու պետք չէ այն լրացուցիչ փորձությունների տանել: «Սիրում եմ քեզ»-ը չպետք է ուղղակի բառերի տեսքով լինի, իրականում դա պետք է ապացուցվի գործով: Աղջիկն իրեն երջանիկ ու սիրված է զգում միայն այն տղամարդու կողքին, ով ամեն օր, ամեն վայրկյան իր գործով, քայլով, ինչու չէ, նաև խոսքով ապացուցում է իր սերը»,- esyes.am-ին ասաց Աննան:

Աննան նշեց, որ հավատում է սիրո գոյությանը: Ըստ նրա` իրական սերը հզոր երևույթ է և պատրաստ է ամեն ինչ հաղթահարել ու ներել. «Ես իմ կողակցին ամեն ինչ ներել եմ ու ամեն ինչի առաջ աչքերս փակել եմ: Էնպես չի, որ ինձ համար դա շատ հեշտ է եղել: Միգուցե ես շատ ռոմանտիկ եմ, բայց իրականում շատ եմ հավատում սիրո գոյությանը: Կյանքն ինձ շատ անգամ է խեղճացրել, կոտրել, ամեն անգամ կարծես «ասել» է` գիտես ինչ, Աննա ջան, չկա սեր, բայց ես էլի աչքերս փակ փորձում եմ հավատալ, որ կա շատ մեծ, շատ հզոր սեր»:

Զույգը 2 տարի ընկերություն է արել: Աննայի փոխանցմամբ` տևական ժամանակ է, ինչ նրանք բաժանված են: Հաղորդավարուհին չհերքեց, որ իր աշխատանքը ևս խոչընդոտել է հարաբերությունների զարգացմանը: «Իրականում հա, կարծում եմ` իմ հեռուստատեսային դեմք լինելու հանգամանքն էլ ինչ-որ խոչընդոտ հանդիսացավ, բայց իսկական սիրո դեպքում տղան էլ, աղջիկն էլ միանշանակ կկարողանան հաղթահարել դա,- ասաց Աննան և հավելեց որ ինքը շատ է սիրում իր աշխատանքը, սակայն հարկ եղած դեպքում պատրաստ է հրաժարվել դրանից: -Եթե մի օր ես զգամ, որ դա խանգարում է իմ ընտանիքին, օրինակ, ավելի հեռու ապագայում, երեխաներիս խնամելուն, պատրաստ եմ հրաժարվել, բայց այդ ժամանակ պետք է հասած լինեմ ինչ-որ կետի: Ես չեմ համարում, որ հիմա հասել եմ ինչ-որ կետի: Թեև ընդամենը 21 տարեկան աղջիկ եմ, ով ձգտել ու հասել է շատ բաների, բայց ես դեռ չունեմ, օրինակ, հեղինակային ծրագիր, կամ ինչ-որ էնպիսի բան, որով կարող եմ հպարտանալ: Նախ' պետք է աշխատանքում կայանամ: Բացի այդ, պետք է հասկանաս, որ քո կողքի տղամարդը քեզ ապահովում ու տալիս է սեր, գուրգուրանք, ապահովություն: Ոչ թե ինքն է արգելում է քեզ զբաղվել գործովդ, այլ ինքդ ես հասկանում, որ դա քեզ խանգարում է, օրինակ, երեխաների հետ ժամանակ անցկացնել: Ես կգնահատեմ այն տղամարդուն, ով չի պահանջի, որ ես թողնեմ այն, ինչն ինձ համար շատ կարևոր է, ինչին ես մանկուց ձգտել եմ, այլ ինքս կգնամ դրան: Եթե, իհարկե, հասկանամ, որ աշխատանքս ինձ խանգարում է, ոչ թե դա լինի քահաճույք: Հայաստանում գոնե մի քիչ պետք է գլուխ բարձրացնի ֆեմինիզմը և ես պատրաստ եմ դրա ջատագովը լինել»:

Երիտասարդ հաղորդավարուհին պատմեց, որ այս շրջանում փորձում է առաջնորդվել «սա էլ կանցնի» կարգախոսով և շարունակել առաջ գնալ' հաղթահարելով բոլոր դժվարությունները: Հնարավոր հաշտության մասին Աննան չխոսեց` նշելով հետևյալը. «Փորձում եմ չապրել անցյալով ու միֆերով ու, երևի թե, ավելի շատ հակված եմ այն մտքին, որ մարդիկ չեն փոխվում. եթե չի ստացվել, ուրեմն չի ստացվել: Պետք է շարունակել առաջ շարժվել, ամեն ինչ անցողիկ է: Վերջերս ընկերուհիս ինձ մետաղադրամ նվիրեց ու պատմեց, որ մի թագավոր մատանի է ունեցել, որի վրա երկու բառ է գրված եղել: Թագավորը, տխուր ժամանակ նայելով մատանուն, ուրախացել է, ուրախ ժամանակ նայել է ու տխրել: Ընկերուհիս ինձ հարցրեց' Ան քո կարծիքով ի՞նչ է գրված եղել, մտածեցի` չկարողացա պատասխանել: Պարզվեց գրված է եղել` սա էլ կանցնի: Հիմա ավելի շատ փորձում եմ առաջնորդվել տխուր եղած ժամանակ այդ մատանուն նայելով: Իսկ ուրախ ժամանակ փորձում եմ վայելել էն լավ, դրական էմոցիաները, որ ունեմ»:

Հաղորդավարուհին նաև խորհուրդ տվեց բոլոր զույգերին պատասխանատու լինել մեկմեկու հանդեպ: «Եթե կան մարդիկ, ովքեր հետաքրքրվում են Աննա Գրիգորյանի կյանքով, թող ոչ թե կյանքով հետաքրքրվեն, այլ դա դաս լինի զույգերին, մասնավորապես` տղաներին, որ սերը խաղ ու պար չէ: Դա մեծ պատասխանատվություն է: Իմ ամենասիրած գործերից մեկում` Էքզյուպերիի «Փոքրիկ իշխանում» մի շատ սիրուն ու լուրջ արտահայտություն կա` դու պատասխանատու ես նրանց համար, ում ընտելացրել ես: Տղամարդը,եթե ռիսկ է անում սեր խոստովանել ու ասել` Դու իմն ես, դա այս աշխարհում ամենամեծ պատասխանատվությունն է, իհարկե, ընտանիքից հետո: Պետք է իրոք վստահ լինես քեզ վրա և պատասխանատվություն կրես այն աղջկա հանդեպ, ում ընտելացրել ես»,- եզրափակեց Աննան: