«Հրապարակ». Աշխատելու փոխարեն ՀՀԿ-ականները կերուխումերի մեջ են

Եթե 2008 թվականի ընտրությունների ժամանակ ՀՀԿ գրասենյակում ասեղ գցելու տեղ չէր լինում, անշլագ ու բրոունյան շարժում էր թե՛ միջանցքներում, թե՛ սենյակներում և թե՛ դրսում, հիմա, Սևակի խոսքերով, «լռություն է՝ խորունկ-խորհրդավոր»: Ըստ «Հրապարակի»՝ այդպիսի լռություն էր ՀՀԿ շտաբում նաև մայիսյան խորհրդարանական ընտրությունների ժամանակ, որովհետև իրական շտաբը ոչ թե ՀՀԿ-ում, այլ Բաղրամյան 26-ում էր:

Լռությունն այս օրերին խորացել է մանավանդ Հովիկ Աբրահամյանի 55-րդ տարեդարձի տոնակատարությունից հետո, որին Սերժ Սարգսյանը չի մասնակցել, տոնակատարությունն էլ առանձնապես շքեղ չի եղել, որ «շեֆը գար, շքեղ կլիներ»,- ասացին: Ինչից էլ Հովիկ Աբրահամյանը բավականին նեղվել է, որն էլ ՀՀԿ-ում հեռուն գնացող եզրակացությունների տեղիք է տվել:

Ի դեպ, ՀՀԿ շտաբում, ի տարբերություն 2008-ի, գրեթե չի լինում Ռուբեն Հայրապետյանը: Իսկ Սամվել Ալեքսանյանն էլ այսքան ժամանակ մեկ անգամ է «երևացել»:

Փոխարենը՝ հաճախացել են սեղանների շուրջ կերուխումերը. չէ՞ որ այս անգամ առանձնապես աշխատելու կարիք էլ չկա, իսկ հանդիպումների Սերժ Սարգսյանը ՀՀԿ-ականներին չի տանում: Երեկ ևս իշխանական վերնախավը՝ Բանակի օրվա առիթով, կերուխումի էր Ծառուկյանի «Օջախում»: