Երևանում կբացվի Wyndham Hotel Yerevan 5-աստղանի հյուրանոցային համալիրը (լուսանկարներ)

Վերջին շրջանում Հայաստանում մեծ թափ է առել հյուրանոցային բիզնեսի ընդլայնումը: Վաղուց խոսակցություններ կային, որ Intercontinental, Kempinski, Wyndham հյուրանոցային օպերատորները պետք է մուտք գործեն Հայաստան և այստեղ ծավալեն իրենց լայնամասշտաբ գործունեությունը:

Ըստ վիճակագրության՝ Հայաստանն այսօր հյուրանոցների թվաքանակի առումով ունի մեծ բացթողում, քանի որ Հայաստանի նկատմամբ զբոսաշրջիկների ունեցած հետաքրքրությունը հինգաստղանի հյուրանոցների պահանջարկ է ձևավորում:

Lurer.com-ը զրուցեց «Լևոն Ամիրխանյան» ՍՊԸ-ի տնօրենների խորհրդի նախագահ Համլետ Ամիրխանյանի հետ, ով Ավան համայնքում կառուցում է Wyndham Hotel Yerevan անվանումը կրող 5-աստղանի հյուրանոցային համալիր:

Այս հյուրանոցն իր տեսակով կտարբերվի մյուս հյուրանոցներից և՛ սպասարկման մակարդակով, և՛ խոհանոցով, և՛ շքեղությամբ:

Հյուրանոցի ներսում և դրսում կլինեն մեծ և նորաոճ լողավազաններ, ֆիթնես-կենտրոն, մարզադահլիճ, 600 տեղից բաղկացած ռեստորան, կոնֆերանս-սրահ, կոնֆերենս VIP սրահ, 200 սենյակային համար, թենիսի կորտ, վոլեյբոլի հրապարակ, 400 մեքենայի համար նախատեսված 21.540 քմ տարածքով ավտոկանգառ, ինչն այսօր հայաստանյան հյուրանոցների շարքում բացառություն է:

Համլետ Ամիրխանյանի խոսքով՝ բացի այն, որ հյուրանոցը կունենա ճկուն գնային համակարգ, կբացվի նաև 300 նոր աշատատեղ: Այն, որ Երևանում ներկայումս հյուրանոցները բավականին թանկ հաճույք են, Wyndham Hotel Yerevan-ը կկոտրի այդ կարծրատիպը, քանի որ այստեղ գնային համակարգը կլինի մատչելի, իսկ սպասարկումը՝ որակյալ, ինչպես հարիր է եվրոպական 5-աստղանի հյուրանոցներին:

«Կբացվի 300 նոր աշխատատեղ: Այսօր Երևանում հյուրանոցների զգալի պակաս կա: Մենք վիճակագրություն ունենք, որով հստակ երևում է, որ հյուրանոցների թիվը Երևանում շատ քիչ է: Երբ միջոցառումներ են տեղի ունենում, օրինակ, Երևանում 2000 հոգի հյուր ունենանք, մենք չենք կարողանա մեր հյուրերին սենյակներ տրամադրել: Այստեղ իսկապես բացակայում են իրական հինգաստղանի հյուրանոցները, իսկ այս մեկն իր ծառայություններով կզբաղեցնի այդ տեղը»,-նշեց Համլետ Ամիրխանյանը:

Հյուրանոցում կլինի ինչպես հայկական, այնպես էլ եվրոպական խոհանոց, զբոսաշրջիկներին կտրամադրվեն վերջին մոդելի ավտոբուսներ, որոնք նրանց կտանեն Հայաստանի զբոսավայրեր, կծանոթացնեն Հայաստանի պատմամշակութային կոթողներին՝ այդ կերպ խթանելով Հայաստանում զբոսաշրջության զարգացումը:

{gallery}hotel{/gallery}