Երեք երեխաների աչքի առաջ ամուսնու և սկեսրոջ կողմից պարբերաբար ենթարկվել է բռնության

Օրեր առաջ Մարդու իրավունքների պաշտպանին էր դիմել մի կին, ով ընտանիքում երեք երեխաների աչքի առաջ ամուսնու և սկեսրոջ կողմից պարբերաբար ենթարկվել է հոգեբանական և ֆիզիկական բռնության:

Գայանե Մուրադյանին ամուսինն ու սկեսուրը ստիպել էին տանից հեռանալ երեխաներից մեկի հետ, իսկ մյուս երկուսին պահել էին իրենց մոտ և թույլ չէին տալիս տեսակցել:

Գայանեն խուսափում էր դիմել ոստիկանություն և Պաշտպանի աշխատակազմ էր դիմել իրեն աջակցելու խնդրով:

Կանանց հարցերով Օմբուդսմենի խորհրդական Աննա Սաֆարյանը կնոջը հոգեբանական աջակցություն տրամադրելուց հետո, նրան ներկայացրել էր նրա իրավունքների պաշտպանության հնարավորությունները, այնուհետև հանցագործության մասին հաղորդում տալու նպատակով կնոջն ուղեկցել ոստիկանություն:

Հաջորդ օրը Գայանեն հեռախոսազրույցի ընթացքում Աննա Սաֆարյանին շնորհակալություն էր հայտնել իր խնդրանքին արագ աձագանքելու համար: Գայանեն պատմել էր նաև, որ ոստիկանները հաղորդում և դրա վերաբերյալ բացատրություն տալուց հետո իրեն տուն են ուղեկցել և ընտանիքի անդամներին զգուշացրել Գայանեի նկատմամբ բռնարարքների դեպքում հետագա հետևանքների մասին:

Մինչ այդ Գայանեն մտավախություն ուներ, որ ամուսնու տուն վերադառնալուց հետո կրկին կենթարկվի բռնության և նրան թույլ չեն տա տեսակցել երեխաներին, սակայն ամուսնու ընտանիքի անդամները տեսնելով Գայանեի՝ իրեն և իր երեխաներին պաշտպանելու հաստատակամությունը, նրա նկատմամբ վերաբերմունքը կտրուկ փոխել են և Գայանեի խոսքերով ասած՝ « իրեն միայն ջան-ով են դիմում»:

Գայանե Մուրադյանի՝ ոստիկանություն ներկայացրած դիմումի ընթացքը գտնվում է Պաշտպանի աշխատակազմի հսկողության տակ:

Կնոջ անուն-ազգանունը փոխված է: