ՀԱՊԿ գլխավոր քարտուղարը լուրջ չի վերաբերվում քաղաքացիական ինքնաթիռները կործանելու մասին Ադրբեջանի որոշմանը

Քաղաքացիական ինքնաթիռներին հարվածելու մասին Ադրբեջանի ընդունած օրենքին Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժան լուրջ չի վերաբերվում. «Կա՛մ անհաջող ինտերպրետացիա է, կա՛մ անհաջող կատակ»,-գտնում է վերջինս: Այս մասին նա հայտարարել է Երևանում տեղի ունեցած մամուլի ասուլիսի ընթացքում: 

Վերջինս խիստ կասկածում է, որ այդ երկրի ղեկավարությունը կարող է քաղաքացիական ինքնաթիռները կործանելու հրաման տալ՝ հաշվի առնելով Հեռավոր Արևելքի ողբերգությունը և այդ դեպքի հետ կապված միջազգային հանրության ռեակցիան: 

Ինչպես արդեն Lurer.com-ը տեղեկացրել էր Ադրբեջանի կառավարությունն օրենք է հաստատել, որով իրավունք է տվել ռազմաօդային ուժերին հարվածել այն բոլոր քաղաքացիական ինքնաթիռներին, որոնք կխախտեն Ադրբեջանի օդային տարածքը։

Փաստաթուղթը, որը նպատակ ունի խափանել Ստեփանակերտում օդանավակայան բացելու պլանները, թույլ էր տալիս Ադրբեջանի կառավարությանը որոշ տարածքներ հայտարարել «արգելված կամ կիսով չափ արգելված» օդային տարածքներ։

Եթե ինքնաթիռի անձնակազմը հրաժարվի ենթարկվել վայրէջք կատարելու հրամանին, կամ բացակայում են ինքնաթիռում անմեղ քաղաքացիների վերաբերյալ ստույգ տվյալները, օրենքը թույլ է տալիս կառավարությանը գնդակոծել քաղաքացիական ինքնաթիռները։