Մենք չպետք է բավարարվենք այսքանով. Արմեն Երիցյան

Այսօր ՀՀ ԱԻ նախարարությունում տեղի է ունեցել հերթական ամենշաբաթյա խորհրդակցությունը, որը վարել է նախարար Արմեն Երիցյանը։

Փրկարար ծառայության տնօրեն, գեներալ-մայոր Ս. Ազարյանը զեկուցեց շաբաթվա ընթացքում հանրապետության տարածքում գրանցված արտակարգ դեպք-պատահարների և դրանց արձագանքման միջոցառումների մասին։

Այս օրերին տարվա ընթացքում իրականացված աշխատանքների մասին հաշվետվություններ են ներկայացնում ԱԻՆ մարզային կառույցները։ Մարզպետարաններում ամփոփիչ խորհրդակցությունների ժամանակ նշվել է հակակարկտային ծառայության աշխատանքի արդյունավետության մասին և առաջարկություններ են եղել ավելացնել մարզերում հակակարկտային կայանների քանակը։

Ամփոփելով անցած շաբաթվա աշխատանքները, երբ ներկայացվեցին ԱԻ նախարարության 2012 թ. ձեռքբերումները, նախարար Ա. Երիցյանը նշեց.

- Մենք չպետք է բավարարվենք այսքանով, քանի որ ձեռքբերումները մեզ ավելի են պարտավորեցնում՝ շարունակել աշխատանքը նույն ոգով ու շարժվել առաջ։ Այս տարի մենք պիտի աշխատանքներ տանենք նոր ամենագնացներ ձեռք բերելու ուղղությամբ, որպեսզի կարողանանք օգնություն ցուցաբերել հեռավոր ու դժվարանցանելի բնակավայրերում ապրող մեր համաքաղաքացիներին։ Մյուս կարևոր խնդիրը Գառնու դիտարանի վերազինումն է ու գործարկումը՝ որպես միջազգային գիտական կենտրոն։ Անհրաժեշտ է սերտացնել նաև համագործակցությունը մեր տարածաշրջանի երկրների սեյսմիկ ծառայությունների հետ։

ԱՌՆԱՊ հիմնադրամի տնօրեն՝ Մ. Պողոսյանը զեկուցեց հունվարի 27-28-ը ՄԱԿ-ի մանկական հիմնադրամի հետ համատեղ Ծաղկաձորում կազմակերպված «Արտակարգ իրավիճակների ժամանակ երեխաների հոգեբանա-սոցիալական աջակցության համակարգում» թեմայով աշխատանքային հանդիպման մասին։ Նպատակն էր քննարկել ԱՌՆԱՊ-ի աշխատանքային խմբի կողմից մշակված' երեխաներին հոգեբանա-սոցիալական աջակցություն տրամադրելու կարգի և արտակարգ իրավիճակների ժամանակ երեխաների հայտնաբերման, գրանցման և ապահով վայր ուղեկցելու մեխանիզմը: