Լուսինեն չի բողոքել իրեն բռնաբարել փորձած համագյուղացու դեմ

Աստղաբերդ կոչվող սարատեղում բռնաբարության փորձի համար ամբաստանյալի աթոռին է հայտնվել 41-ամյա Ս. Մելքոնյանը: Քննությամբ մասնավորապես պարզվել է, որ Կոտայքի մարզի բնակիչ, նախկինում երեք անգամ դատված, դատվածությունը դեռ չմարված Ս. Մելքոնյանը 2012թ հուլիսի 12-ին՝ ժամը 02:00-ից 03:00-ը ժամանակահատվածում, մտել է համագյուղացի Լուսինեի (անունը փոխված է) վագոն-տնակ և, վերջինիս կամքին հակառակ, փորձել է նրա հետ սեռական հարաբերություն ունենալ:

Լուսինեն, բնականաբար, դիմադրություն է ցուցաբերել, թեյի բաժակով տուր թե կտաս նրա գլխին, հետո փախել է տնակից, բայց վայր է ընկել տնակի դիմաց: Քրեական գործի նյութերի համաձայն՝ այդ ընթացքում Ս. Մելքոնյանը մոտեցել է Լ. Մարտիրոսյանին, մի ձեռքով բռնել է նրա կոկորդից, իսկ մյուս ձեռքին եղած դանակով սպառնացել է վերջինիս կյանքից զրկել: Ինչևէ, միայն Լուսինեի դիմադրության շնորհիվ է, որ Ս. Մելքոնյանն իր կամքից անկախ հանգամանքներով չի կարողացել ավարտին հասցնել հանցագործությունը:

Ս. Մելքոնյանին, որի նկատմամբ որպես խափանման միջոց, ընտրվել է կալանքը, մեղադրանք է առաջադրվել ՀՀ քրեական օրենսգրքի 137-րդ և 34-138-րդ հոդվածների 1-ին մասերի հատկանիշներով, այսինքն՝ տվյալ պարագայում սպանության սպառնալիքի և բռնաբարության հանցափորձի համար: Վերջինի դեպքում օրենսգրքով նախատեսված է ազատազրկում՝ 3-6 տարի ժամկետով: Հետագայում, սակայն, այս քրեական գործը Աբովյանի ընդհանուր իրավասության առաջին ատյանի դատարանում (նախագահող դատավոր՝ Յուրի Բաղդասարյան) ուշագրավ ընթացք է ստացել: Տուժողը՝ Լուսինեն, դատական նիստի նախապատրաստական մասում, ս.թ. հունվարի 17-ին գրավոր դիմում է ներկայացրել հիշյալ դատարան այն մասին, որ հաշտվել է Սիսակ Մելքոնյանի հետ, նրա դեմ բողոք և քաղհայցի պահանջ չունի, ապա խնդրել է վերջինիս քրեական պատասխանատվությունից ազատել, քանի որ համագյուղացիներ են և հետագայում նույն գյուղում են ապրելու:

Ըստ ամբաստանյալի շահերի պաշտպան, հանրային պաշտպան Ա. Սահակյանի՝ դատարան ներկայացրած միջնորդության, տուժողի հաշտության պարագայում անհրաժեշտ է ՀՀ քրեական օրենսգրքի 137-րդ հոդվածի 1-ին մասով ամբաստանյալ Ս. Մելքոնյանին առաջադրված մեղադրանքի մասով քրեական գործի վարույթը կարճել և ամբաստանյալի նկատմամբ նշված հոդվածի 1-ին մասով քրեական հետապնդումը դադարեցնել:

Հաշվի առնելով նաև, որ ՀՀ քրեական օրենսգրքի 137-րդ հոդվածի 1-ին մասով նախատեսված հանցագործության վերաբերյալ գործը մասնավոր հետապնդման գործ է, ՀՀ քրեական դատավարության օրենսգրքի 183-րդ հոդվածի համաձայն՝ քրեական օրենսգրքի 137-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման, դատարանը 17.01.2013թ. որոշմամբ տուժողի դիմումը ու նրա շահերի պաշտպանի միջնորդությունը բավարարել է, ՀՀ քրեական օրենսգրքի 137-րդ հոդվածի 1-ին մասով քրեական գործի վարույթը կարճել և դադարեցրել է Ս. Մելքոնյանի նկատմամբ քրեական հետապնդումը: Ստացվում է, որ տուժողը ներքին թե արտաքին ինչ-որ դրդմամբ հաշտվել է նույնիսկ… իրեն բռնաբարել փորձած անձնավորության հետ:

ՀՀ քրեական օրենսգրքի 34-138-րդ հոդվածով առաջադրված մեղադրանքի մասով գործի դատաքննությունը Կոտայքի մարզի ընդհանուր իրավասության առաջին ատյանի դատարանում, դատավոր Յուրի Բաղդասարյանի նախագահությամբ շարունակվում է: