Շրջակա միջավայրի նախարարության Էկոպարեկային ծառայության ձևավորումը հստակ արտահայտում է մեր կառավարության քաղաքական կամքը․ Համբարձում Մաթևոսյան

 

Միջոցառմանը մասնակցեցին ՀՀ վարչապետ Նիկոլ Փաշինյանը, օրենսդիր և գործադիր մարմինների, ինչպես նաև տեղական ինքնակառավարման մարմինների ներկայացուցիչներ։

 

Շրջակա միջավայրի նախարարության Էկոպարեկային ծառայության ձևավորումը հստակ արտահայտում է մեր կառավարության քաղաքական կամքը՝ վերափոխելու բնապահպանական վերահսկողության ողջ համակարգը և այն դարձնելու ժամանակակից, արդյունավետ և կանխարգելիչ։ Մենք անցում ենք կատարում այնպիսի մոդելի, որտեղ պետությունը ոչ թե արձագանքում է արդեն կատարված իրավախախտումներին, այլ ձևավորում է դրանց կանխարգելման իրական կարողություններ։

 

Տավուշի մարզը, լինելով Հայաստանի ամենաանտառապատ և կենսաբազմազանությամբ հարուստ տարածքներից մեկը, առանձնահատուկ նշանակություն ունի այս համատեքստում։ Այստեղ Էկոպարեկային ծառայության լիարժեք գործարկումը ոչ միայն տարածքային կառույցի ձևավորում է, այլև բնության պահպանության նոր մշակույթի հաստատում։

 

Ծառայության նյութատեխնիկական հագեցվածությունը արդեն իսկ խոսում է մեր որդեգրած մոտեցումների լրջության մասին։ Նոր ծառայողական ավտոմեքենաները, հագեցած ժամանակակից մոբայլ համակարգերով, ապահովում են արագ արձագանքման և վերահսկողության բարձր արդյունավետություն։ Դրանց մի զգալի մասը համալրված է նաև հակահրդեհային տեխնիկայով, ինչը հատկապես կարևոր է անտառային տարածքների պաշտպանության տեսանկյունից։

 

Միաժամանակ, մենք մեծ ուշադրություն ենք դարձրել մարդկային ռեսուրսների որակին։ Ծառայությունը համալրված է 128 էկոպարեկով, որոնք անցել են ընտրության և պատրաստվածության փուլեր՝ ստանալով համապատասխան գիտելիքներ և հմտություններ։ Նրանք ապահովված են ժամանակակից տեխնիկական միջոցներով՝ ներառյալ տեսանկարահանող սարքեր, թվային գործիքներ և օպերատիվ կառավարման համակարգեր, որոնք հնարավորություն են տալիս տեղում և անմիջապես արձանագրել իրավախախտումները և իրականացնել համապատասխան ընթացակարգեր։

Սյունիքի մարզում ծառայության ամբողջական գործարկումից ի վեր մենք արդեն ունենք հստակ, չափելի և փաստարկված արդյունքներ․ արձանագրվել է վերահսկողության զգալի ուժեղացում․ հայտնաբերված իրավախախտումների դեպքերը աճել են շուրջ 2.5 անգամ, իսկ արձագանքման միջին ժամանակը կրճատվել է ավելի քան 40 տոկոսով։

 

Այս ծառայությամբ մենք հստակ ազդակ ենք հղում, որ պետությունը վճռական է՝ ապահովելու օրենքի գերակայությունը բնապահպանության ոլորտում, կանխելու ապօրինի գործունեությունը և պաշտպանելու մեր երկրի բնական հարստությունները՝ հանուն ներկա և ապագա սերունդների։

Այս ամենը կարևոր է նաև ավելի լայն համատեքստում։

Հայաստանը պատրաստվում է հյուրընկալել և արդեն իսկ նախագահում է ՄԱԿ Կենսաբազմազանության մասին կոնվենցիայի կողմերի 17-րդ համաժողովը՝ COP17-ը, և մեր երկրի համար կարևոր է հանդես գալ օրինակելի և գործող համակարգերով։

 

Շնորհակալություն եմ հայտնում ծառայության կայացման գործում ներգրավված բոլոր գործընկերներին՝ պետական և տեղական ինքնակառավարման մարմիններին, ինչպես նաև միջազգային գործընկերներին՝ արդյունավետ համագործակցության և ներդրված աշխատանքի համար։

Վստահ եմ՝ Էկոպարեկային ծառայության գործունեությունը կունենա տեսանելի և երկարաժամկետ ազդեցություն մեր բնական միջավայրի պահպանության գործում»։