«ՀԺ». Վարդան Ղուկասյանի որդին վերադարձել է Դեդ Հասանի հուղարկավորությունից

«Հայկական ժամանակ» թերթի աղբյուրները հայտնում են, որ Գյումրիի նախկին քաղաքապետ Վարդան Ղուկասյանի որդին՝ Սպարտակը, ով օրեր առաջ մեկնել էր Մոսկվա, վերադարձել է։ 

Կրտսեր Ղուկասյանի նկատմամբ, հիշեցնենք, խափանման միջոց էր ընտրվել ստորագրությամբ բնակավայրից չհեռանալը, իսկ նրա մեկնումը երկրից ոստիկանությունից բացատրել էին նրանով, թե համապատասխան բժշկական տեղեկանք է ներկայացրել և շտապ մեկնել է ՌԴ՝ բուժվելու։ Իրականում, ըստ լուրերի, Ս. Ղուկասյանը ՌԴ էր մեկնել «օրենքով գող» Դեդ Հասանի հուղարկավորությանը մասնակցելու։

Երբ զանգահարեցինք Վ. Ղուկասյանի մամուլի խոսնակ Լիլիթ Աղեկյանին՝ պաշտոնապես ճշտելու տեղեկությունը, նա պատասխանեց. «Ես ո՛չ բժշկական թղթից եմ տեղյակ, ո՛չ գնալուց, դա ընտանեկան խնդիր է։ Ես ինքս հիմա քաղաքում չեմ և տեղյակ չեմ՝ նա քաղաքում է, թե՝ ոչ։ Կրտսեր Ղուկասյանը, սակայն, ոչ միայն վերադարձել է։ Երեկ Գյումրիի «Ասպարեզ» ակումբը հաղորդագրություն տարածեց, որ Գյումրիի Գ. Նժդեհ փողոցում վերսկսվել են ապօրինի կառուցվող գազալցակայանի շինարարական աշխատանքները։ Շինարարությունը կապվում է հենց Սպարտակ Ղուկասյանի անվան հետ:

Գյումրիի քաղաքապետի խոսնակ Զոհրապ Եգանյանը թերթին հայտնել է, որ ապօրինի կառուցվող գազալցակայանի շինարարությունն իրականացնող «Դանիկո» ընկերությանը քաղաքապետարանը 2 անգամ վարչական տույժի է ենթարկել, որից հետո գործն ուղարկվել է ոստիկանություն։ Այնտեղ նյութեր են նախապատրաստվում»։