Ադրբեջանական իշխանությունները շարունակում են բռնություններ կիրառել. Human rights watch

Աշխարհ 30 Հունվար, 2013 10:55

Մարդու իրավունքների Human rights watch պաշտպանության կազմակերպությունն Ադրբեջանի կառավարությունից պահանջել է ապահովել Իսմաիլի ցուցարարների իրավունքները: Ադրբեջանի իշխանությունները պետք է ապահովեն Իսմաիլի քաղաքում խաղաղ ցույցի ժամանակ ձերբակալված յուրաքանչյուր մարդու շփումն իր իրավաբանների հետ և հաստատեն, որ բանտում բռնություններ չեն գործադրվում նրանց նկատմամբ:

Խռովությունները ծագել էին 2013-ի հունվարի 23-ին Բաքվից 200 կմ հյուսիս-արևմուտք գտնվող շրջանային կենտրոնում: Իսմաիլիյի բնակիչներին զայրացրել էր Չիրաղ հյյուրանոցի տնօրեն Էմիլ Շամսադդինի վարքը, ով ոչ սթափ վիճակում ոչ միայն ՃՏՊ-ի պատճառ էր դարձել, այլև իր ընկեր Էլմադդին Մամեդովի հետ ծեծի էր ենթարկել տեղի ՎԱԶ 2107 ավտոմեքենայի վարորդ, տեղի բնակիչ Ռամիլ Բակիրովին: Արդյունքում ցուցարարներն այրել էին հյուրանոցն ու նրա տիրոջը պատկանող 2 մեքենաներ: Բազմաթիվ ԶԼՄ-ներ նշում էին, որ ցույցի ժամանակ բախումներ են տեղի ունեցել ոստիկանության և ցուցարարների միջև: Ոստիկանությունը ստիպված է եղել օգտագործել արցունքաբեր գազ և ռեզինե գնդակներ՝ ցույցը ցրելու նպատակով: Այնուհետև տասնյակ մարդիկ են ձերբակալվել, չնայած որ ադրբեջանական իշխանությունները նշում են, որ հունվարի 30-ի դրությամբ միայն 12 մարդ է մնացել բանտում, իսկ մնացածն ազատ են արձակվել:

«Բազմիցս արձանագրվել է ձերբակալվածների նկատմամբ բռնությունների դեպքեր ադրբեջանական իշխանությունների կողմից»,-այս մասին նշել է Human rights watch-ի Հարավային Կովկասի մասնագետ Ջիորջի Ջոջիան և ավելացրել, որ կառավարությունը պետք է հաստատի, որ ոչ մի բռնություն չի գործադրվի Իսմաիլի քաղաքում ձերբակալված ցուցարարների նկատմամբ, իսկ դրանից խուսափելու գլխավոր պայմանն իրավապաշտպանների հետ հանդիպումն ապահովելն է»:

Չնայած որ բռնությունների վերաբերյալ արձանագրությունները դժվար է հաստատել, սակայն 3 իրավապաշտպան նշել է, որ տեղի են ունեցել բռնություններ ձերբակալվածների նկատմամբ:

Հունվարի 26-ին ոստիկանությունը շրջապատել և ցրել էր Բաքվում տեղի ունեցող ցույցերը, որոնք տեղի էին ունենում՝ ի պաշտպանություն Իսմաիլի քաղաքում տեղի ունեցող ցույցերի:

Հունվարի 29-ին Իսմաիլիում ադրբեջանական իշխանությունները խոչընդոտել էին 20 մարդու իրավապաշտպանի գործունեություն: Վերջիններս ձերբակալվել են և տեղափոխվել բանտ, որտեղ հարցաքննվել են ոստիկանության կողմից:

Իսմաիլիում բռնությունները տեղի ունեցան 1 շաբաթ անց այն բանից հետո, երբ ԵԽԽՎ-ն խստորեն քննադատեց Բաքվում արձանագրված մարդու իրավունքների ոտնահարումները: