Ղարաբաղյան հակաօդային «ռուլետկան». Независимая Газета

Երեկ ավարտվեց ՌԴ պաշտպանության նախարար Սերգեյ Շոյգուի այցը Հայաստան: Ռուսաստանի ռազմական գերատեսչությունը նշում է, որ այցը պլանային էր, չնայած, որ այն անցավ Ղարաբաղյան հակամարտության շուրջ սրված իրավիճակի ֆոնի վրա, այնպես որ, Շոյգուի շփումը Հայաստանի ղեկավարության հետ կարևոր քայլ էր. գրում է Независимая Газета-ն:

Մոսկվան լուրջ տագնապներ ունի պաշտոնական Բաքվի տարածած հայտարարության պատճառով, թե Ադրբեջանի հակաօդային ուժերը հրաման են ստացել ոչնչացնել իր կարծիքով «ապօրինի կերպով իր օդային տարածքը հատած» քաղաքացիական ինքնաթիռները:

Ռուս փորձագետները կարծում են, որ Բաքվի նման դիրքորոշումը կարող է հանգեցնել պատերազմի:

Բաքվին նման հնարավորություն ընձեռվեց այն բանից հետո, երբ 2010-ին Ռուսաստանի այն ժամանակվա նախագահ Դմիտրի Մեդվեդևը, հրաժարվելով Իրանի հետ համապատասխան պայմանագրից, Ադրբեջանին վաճառեց գերժամանակակից և որոշ պարամետրերով աշխարհում իր նմանը չունեցող 2 զենիթա-հրթռային «Ֆավորիտ» տիպի դիվիզիոն: Այս զենիթա-հրթռային համակարգերը տեխնիկական բնութագրերով կարող են վերահսկել Լեռնային Ղարաբաղի օդային տարածքը: НГ-ի՝ ՊՆ-ում ունեցած աղբյուրները հաստատում են, որ Մոսկվայի և Բաքվի միջև Գաբալայի ռադիոլոկացիոն կայանի շուրջ բանակցությունների տապալումից հետո Ռուսաստանի նախագահ Պուտինը հրաժարվել է Ադրբեջանին 3-րդ նման դիվիզիոնը վաճառելու գաղափարից:

ԶԼՄ-ները չեն հայտնում, թե բարձրացվել է արդյոք Շոյգուի կողմից Ստեփանակերտի օդանավակայանի բացման հարցը նախագահ Սերժ Սարգսյանի և Պաշտպանության նախարար Սեյրան Օհանյանի հետ հանդիպման ժամանակ: Չնայած ՌԴ ՊՆ աղբյուրները պարբերականին տեղեկացրել են, որ ռուսական պատվիրակության ներկայացուցիչները ոչ պաշտոնական մակարդակով խորհուրդ են տվել չսկսել Ղարաբաղի տարածքով քաղաքացիական ինքնաթիռների շահագործումը:

Սրանից զատ՝ հանդիպմանը քննարկվել է նաև Ռուսաստանի և Հայաստանի միջև ռազմա-տեխնիկական համագործակցության նախագիծը, որը պետք է ստորագրվի 2 երկրների ղեկավարների կողմից մոտ ժամանակներս:

«Ռուսաստանը վերջապես դեմքով է շրջվում Հարավային Կովկասում իր գլխավոր և ռազմավարական դաշնակից Հայաստանին: Նրա ռազմական կարողության ամրապնդումը տարածաշրջանում կայունության ամրապնդան երաշխիքն է: Դա զսպող գործոն է Ադրբեջանի համար, որը ձգտում է ղարաբաղյան խնդիրը լուծել ռազմական ճանապարհով»,– ասել է Անդրկովկասում ռուսական զորքերի հրամանատարի տեղակալի պաշտոնում ավելի քան 6 տարի ծառայած գեներալ-լեյտենանտ Յուրի Նետկաչևը:

«Իրանի փոխարեն Ադրբեջանին «Ֆավորիտ» հակաօդային համակարգ վաճառելը քաղաքական սխալ հաշվարկ էր, իսկ ավելի ճիշտ ասած՝ Մեդվեդևի աշխարհաքաղաքական սխալը: Մենք շատ ենք տուժել նաև՝ Վաշինգտոնի և Իսրայելի հետ համաձայնագրեր կնքելով: Սրանք սխալներ են, որ հիմա շատ դժվար է ուղղել, այդ թվում և Ադրբեջանի հետ հարաբերությունների հարցը, քանի որ վերջինս մեծացնում է իր ռազմական բյուջեն և դիմում գործողությունների, որոնք հակասում են Ռուսաստանի և նրա դաշնակիցների շահերին»,-հայտարարել է աշխարհաքաղաքական խնդիրների ակադեմիայի նախագահ գեներալ-գնդապետ Լեոնիդ Իվաշովը: