Վրաստանում բացատրել են՝ ինչու է Զելենսկին ակտիվացել Հարավային Կովկասում

Վրացի փորձագետ Պետրե Մամրաձեն հայտարարել է, որ Ուկրաինայի նախագահ Վլադիմիր Զելենսկու ակտիվությունը Հարավային Կովկասում նպատակ ունի տարածաշրջանի առաջնորդներին համոզել, թե Ուկրաինան հաջողություններ է գրանցում Ռուսաստանի դեմ պատերազմում։ Նրա խոսքերը հրապարակել է ռուսական «Взгляд» թերթը։

Մամրաձեն անդրադարձել է Զելենսկու վերջին այցերին Բաքու և Երևան, ինչպես նաև Հայաստանում Վրաստանի վարչապետ Իրակլի Կոբախիձեի հետ հանդիպմանը։ Փորձագետի կարծիքով՝ Ուկրաինայի նախագահը փորձում է բոլորին ներկայացնել, որ Կիևը հաղթում է ռազմաճակատում և շարունակում է պահպանել քաղաքական ազդեցությունը տարածաշրջանում։

Միաժամանակ վրացի վերլուծաբանը նշել է, որ Թբիլիսին չպետք է «թուլացնի զգոնությունը»՝ հիշեցնելով Կիևի հետ նախկին տարաձայնությունները, այդ թվում՝ դիվանագիտական խնդիրներն ու ռազմական թեմաներով հնչած հայտարարությունները։ Սակայն նա ընդգծել է, որ Վրաստանը չի պատրաստվում վատացնել հարաբերությունները ուկրաինացի ժողովրդի հետ՝ քաղաքական տարաձայնությունների պատճառով։