Սոնա Շահգելդյանի «Հարսի շորը»

Սոնա Շահգելդյանի համար տարին բավականին բուռն է սկսել: Չհաշված, որ երգչուհին տարեվերջին ներկայացրեց միանգամից երկու տեսահոլովակ: Այժմ նկարահանում է նորը, որն ինչպես նշեց երգչուհին, ArmStar.am-ի հետ զրույցում, հնարավոր է՝ պատրաստ լինի փետրվար ամսին:
Տեսահոլովակը նկարահանվում է «Հարսի շոր» երգի հիման վրա: Տեսահոլովակի ռեժիսորը Լուսինե Մարտիրոսյանն է:
Ինչպես նշեց երգչուհին, այս տեսահոլովակը տարբերվելու է մյուսներից.

-Սա միայն տեսահոլովակ չի լինելու: Այն լինելու է ծեսերով, ադաթներով մի հիանալի փոքրիկ տեսաֆիլմ:
Չեմ կարող գաղտնիքը բացել և ասել, թե բացի ինձնից էլ ով է նկարահանվելու: Միայն կարող եմ խոսք տալ, որ շատ լավ տեսահոլովակ է լինելու: Իսկ ես միշտ իմ խոսքի տերն եմ:
Այն իր բնույթով ամբողջովին նորություն է լինելու: Ոչ մեկից չենք վերցնելու, չենք կրկնօրինակելու: Տեսահոլովակն իրենից ներկայացնելու է պատմություն:

-Իսկ ինչո՞ւ հենց այս երգի հիման վրա որոշեցիք նկարահանել տեսահոլովակ:
-Ես չեմ մտածել, որ այս տեսահոլովակը լինի, ես էլ գումար աշխատեմ:
Այս երգը գրվել է նորապսակների համար, որոնց անունը չեմ տա, և հարսանիքի ընթացքում այն կատարել եմ ես: Երգի երաժշտության հեղինակը Մանե Հակոբյանն է, խոսքերինը՝ Ավետ Բարսեղյանը:
Իրականում այս տեսահոլովակն ավելի վաղ պետք է նկարահանված լիներ, երբ ես «Նոր ալիք մրցույթից» հաղթած եկա: Ինձ խոստացել էին, որ պետք է տեսահոլովակ նկարահանվեր: Սակայն այդ խոստումը նրանք չկատարեցին: Եվ ես որոշեցի իմ ուժերով այն նկարահանել:

Ինչպես ասաց Սոնան, երգն արդեն բավականին ճանաչում ունի.
-Եթե ճիշտն ասեմ, ապա երգն արդեն շատ է սիրվել: Եթե ես չերգեի, միգուցե երգը չլսվեր, կամ երգողը լավը չլիներ: Կամ գուցե հենց ես ուրիշ երգ կատարեի, ու այսքան չսիրվեր: Ամեն ինչ համընթաց ու համահունչ ստացվեց: Կարծում եմ, որ լավ, մնայուն տեսահոլովակ կստանանք: