«Հայկական ժամանակ». Քաղաքապետարանի անգործությունը մոտ 100 ավտովթարի պատճառ է դարձել

Երեկ առավոտյան Երևանի փողոցները նման էին հոլիվուդյան «ֆիլմ աղետների» տեսարաններին, փողոցները լեցուն էին վթարված մեքենաներով: Պատճառը գիշերային ձնախառն անձրևից հետո վաղ առավոտյան առաջացած մերկասառույցն էր:

«Հայկական ժամանակը» երեկ փորձեց պարզել, թե առավոտյան ժամերին քանի ավտովթար է արձանագրվել: Ճանապարհային ոստիկանության տվյալներով արձանագրվել է ընդամենը 10 ավտովթար, ինչը ըստ ՃՈ-ի՝ արտառոց չէ:

Բայց քանի որ պարտադիր ապահովսւգրության համակարգի ներդրումից հետո ՃՈ-ն այլևս ոչ բոլոր պատահարներն է արձանագրում, ուստի «ՀԺ»-ն դիմեց ապահովագրական ընկերություններին: Օրինակ «Ինգո Արմենիայից» տեղեկացրեցին, որ իրենց ընկերության հաճախորդներից երեկ առավոտյան 54-ն է վթարվել: Իսկ «Ռոսգոսստրախ»-ից հայտնեցին, որ առավոտյան ժամը 8-ից մերկասառույցի պատճառով իրենց ընկերության հաճախորդներից վթարի են ենթարկվել 80-ը: Հաշվի առնելով, որ այսօր Հայաստանում գործում է մոտ մեկ տասնյակ ապահովագրական ընկերություն, կարելի է մոտավոր պատկերացում կազմել, թե քանի մեքենա է վթարվել մերկասառույցի պատճառով:

Թերևս ավելորդ է արձանագրել, որ Երևանի քաղաքապետարանը բացարձակապես ոչինչ չի արել նման իրավիճակը կանխելու համար: