«168 ժամ». Ընտրությունների այս տխուր վիճակի համար պատասխանատու են նաև ՀԱԿ-ը, ԲՀԿ-ն և Դաշնակցությունը

Գրող, սցենարիստ Վահրամ Մարտիրոսյանի կարծիքով՝ Հայ ազգային կոնգրեսը, «Բարգավաճ Հայաստանը» և Դաշնակցությունը նույնքան պատասխանատու են ՀՀ նախագահի ընտրությունների այս տխուր վիճակի համար, որքան իշխանությունը, որը հաջողացրեց քաղաքական այդ երեք ուժերին մեկուսացնել, ինչի արդյունքում նրանք թեկնածուներ չառաջադրեցին, գրում է «168 ժամ»-ը:

Անդրադառնալով այս ընտրությունների նկատմամբ հասարակության անտարբերությանը, նա ասել է. «Մենք էդ հասարակության մասն ենք, ու մեզ դնենք մեր կողքի մարդկանց վիճակում: ԲՀԿ-ն ստացել էր մի քանի հարյուր հազար ձայն, իսկ իր ընտրազանգվածը մնացել է առանց թեկնածուի, ՀԱԿ-ը հարյուր-հազարավոր մարդկանց էր հավաքում հանրահավաքների, Դաշնակցությունն էլ իր բավական կայուն ընտրազանգվածն ունի: Եթե այդ ուժերի պատգամավորության մանդատները գումարենք իրար, ապա 40%-ից ավելի ձայն ունեն խորհրդարանում: Հիմա էդ ուժերը դուրս են եկել խաղից: Մարդը ռոբոտ չէ, որ ծրագիրը փոխես, մարտկոցը փոխես, ու վաղվանից ուրիշ քաղաքական համակրանք ունենա ու գնա ոգևորված ուրիշին ընտրի: Ընդհանրապես հայերը հակված են տխրության, դժբախտության, որը, երևի, պայմանավորված է պատմական ճակատագրով, դրան գումարվել է էս վիճակը»: