«168 ժամ». Ժողովուրդը պետք է միշտ խեղճացած, նվաստացած, հեշտ կառավարվող և իշխանություններից կախված լինի

«Կարիք չկա սոցիոլոգիական հետազոտություններ անցկացնել՝ համոզվելու համար, որ անհույս միամիտներից բացի՝ ոչ ոք չի հավատում նախագահի թեկնածուների խոստումներին: Մենք վարժվել ենք այն բանին, որ մեր հասարակությունը մշտապես բարեգործների կարիք ունենա: Մեր երկրում այդպես էլ չստեղծվեցին այն նախապայմանները, որոնց առկայությամբ մարդիկ կարողանան աշխատանքով, սեփական ուժերով լուծել իրենց խնդիրները: Նրանք պետք է միշտ խեղճացած, նվաստացած, հեշտ կառավարվող և իշխանություններից կախված լինեն: Իշխանությունները կարծես ձգտում են ժողովրդին պահել մուրացկանի կարգավիճակում: Դա աղետալի երևույթ է: Այն հիվանդացնում է հասարակությանը և դարձնում արժանապատվությունից զուրկ, նվաստ, խեղճ: Ինչքան շուտ հասարակությունը կարողանա ձերբազատվել այս խեղճությունից, այնքան երկիրը երկրի կնմանվի»,- անդրադառնալով ՀՀ նախագահի ընտրություններին «168 ժամին» ասել է փորձառու լրագրող, խմբագիր Վասակ Դարբինյանը:

Նա նաև նշել է, որ ժողովուրդն ընտրություններին կարծես թե անելիք չունի. «Ընտրություններ կոչվածն այլևս լուրջ չի ընկալվում: Ժողովուրդը համոզվել է, որ ընտրում է մի բան, իրեն մատուցում են մեկ այլ բան: Սա դարձել է օրինաչափություն: Ինչ վերաբերում է այս ընտրություններին, ապա առավել հաճախ հնչող գնահատականն այն է, որ երբեք այսքան անհետաքրքիր, իմաստազուրկ, կանխորոշված ընտրություններ չեն եղել»: