«ՀԺ». Վարդանիկի գործերը

Ֆինանսների նախարարությունից երեկ պաշտոնապես տարածեցին, որ Գյումրիի քաղաքապետարանում դեռ անցյալ տարվա նոյեմբերից
սկսած ստուգումներն ավարտել են. ստուգման արդյունքում կազմվել է ակտ, իսկ ստուգումների վերաբերյալ նյութերը նախօրեին
ուղարկվել են ՀՀ ոստիկանության քննչական գլխավոր վարչություն: 

Թե ինչ չարաշահումներ են հայտնաբերվել, պաշտոնապես ոչինչ չի ասվում: Նշված ստուգումները սկսվելու օրերին «Հայկական ժամանակը»
տեղեկացրել էր, որ ֆիննախի վերահսկողական տեսչությունն ուսումնասիրում է Գյումրիի նախկին քաղաքապետ Վարդան Ղուկասյանի պաշտոնավարման շրջանի փաստաթղթերը: Երեկ իրազեկ աղբյուրներից հայտնի դարձավ, որ հայտնաբերվել են խայտառակ չարաշահումներ. մասնավորապես, քաղաքապետարանի փաստաթղթերում ֆիքսված է, որ օրինակ, «Գյումրեցի ընկերներ» ՍՊԸ-ին, որը կապվում է Վարդան Ղուկասյանի որդու անվան հետ, քաղաքապետարանը պարտք է մոտ 400 միլիոն դրամ: Պարզվել է, սակայն, որ իրականում այդ ՍՊԸ-ին քաղաքապետարանը ոչ մի լումա չպիտի տա: Քաղաքապետարանի փաստաթղթերում նշված են այլ պարտքեր, որոնք իբր տարբեր կազմակերպությունների պետք է վճարվեն, բայց իրականում նման գործարքներ չեն եղել:

«ՀԺ»-ն տեղեկացրել էր, որ Վարդան Ղուկասյանի պաշտոնանկաթյունից հետո Գյումրիի քաղաքապետարանը մոտ 1 միլիարդ 200 մլն դրամ պարտք է ունեցել զանազան կազմակերպությունների: Խոսակցություններ կային, որ նախագահի ընտրություններից առաջ հնարավոր է անգամ, Ղուկասյանն անազատության մեջ հայտնվի: