Սաակաշվիլին քարոզչական նպատակով ցուցադրել է քնած քութաիսցի պատգամավորի լուսանկարը

Վրաստանի նախագահ Միխայիլ Սահակաշվիլին Քութաիսիի բնակիչների հետ հանդիպման ժամանակ հավաքվածներին ցույց է տվել պատգամավոր Գուբազ Սանիկիձեի` քնած վիճակում արված լուսանկարը: Հայտնում է Новости-Грузия-ն:

Հանդիպումը տեղի է ունեցել Թբիլիսիում` նախագահական նստավայրում, ուր ժամանել էին Քութաիսիի համալսարանի ուսանողներն ու դասախոսները: Լուսանկարը, ինչպես հայտնում է REGNUM-ը, նախագահը հանել էր կոստյումի գրպանից:

Նշենք, որ Գուբազ Սանիկիձեն Վրաստանի խորհրդարանի մեծամասնական պատգամավոր է Քութաիսիից և իշխող «Վրացական երազանք» կոալիցիայի անդամ, որն իր հերթին հանդես է գալիս գործող նախագահ Միխայիլ Սաակաշվիլիի դեմ: Քնած խորհրդարանականի լուսանկարը վերջերս էր տարածվում սոցիալական ցանցերում: Հավաստիացվում էր, որ այն արվել էր խորհրդարանում նիստի ժամանակ:

«Սա ձեր մեծամասնական պատգամավորն է, և մինչ նա քնած է Քութաիսիի խորհրդարանում, դուք՝ քաղաքացիական հասարակությունը, պետք է արթնանաք, որպեսզի ձեզանից չխլեն խորհրդարանը, որպեսզի Վրաստանից չխլեն Վրաստանի համար մի շատ կարևոր գաղափար` ռեգիոնալիզմի, Վրաստանի ամրապնդման գաղափարը, որը և մարմնավորում է Քութայիսի խորհրդարանը»,-դիմելով հավաքված քութաիսցիներին՝ կոչ է արել Վրաստանի նախագահը:

Հիշեցնենք, որ Վրաստանի խորհրդարանն ավելի վաղ մայրաքաղաքից տեղափոխվել էր Քութայիսի (Արևմտյան Վրաստան): Նախաձեռնության հեղինակները, որոնցից մեկը հենց Միխայիլ Սաակաշվիլին էր, հայտարարել էին, որ օրենսդիր մարմնի տեղափոխումը կնպաստի արևմտավրացական քաղաքի զարգացմանը: