Աղանդավորական քարոզչություն մանկապարտեզում (տեսանյութ)

«Սինջար» եզդիների ազգային միավորում ՀԿ նախագահ Բորիս Թամոյանը և «Հայաստանի երիտասարդ եզդիների ասոցացիա» ՀԿ նախագահ Սաիդ Ավդալյանն այսօր համատեղ ասուլիսի ընթացքում ներկայացրին խնդիր, որն անհանգստացնում է մի խումբ եզդիների: Բանախոսների խոսքով՝ աղանդավորները քայքայում են եզդիական համայնքները:

«Խոսքը վերաբերում է Արագածոտնի մարզի Սադոնց գյուղին, որտեղ արդեն երկար ժամանակ գործում է աղանդավորական կառույց, և այդ կառույցն իր գործունեությունը ծավալում է մանկապարտեզում: Նրա նպատակն է խավարից հանել եզդիներին և տանել դեպի լույսը»:

Բորիս Թամոյանն իր խոսքում նշեց, որ մարզպետն իրենց տեղեկացրել է, որ այդ նախակրթարանը գործել է ընդամենը 2 ամիս, ապա՝ փակվել: Սա վերջինիս հիմք է տվել մտածելու, որ նախակրթարանը չի ունեցել լիցենզիա: 

Ասուլիսի մյուս բանախոս Սաիդ Ավդալյան ասաց. «Առանձին աղանդավորական շարժում է, որի  գլխավոր գրասենյակը գտնվում է ԱՄՆ Գլենդել քաղաքում: Հայաստանում կենտրոնացած են Արագածոտնի մարզի 11 գյուղերում: Հիմնականում իրենց գործունեությունն իրականացնում են կրթական, առողջական և հոգևոր ոլորտներում»:

Վերջինիս խոսքով՝ այդ շարժումը տարածում է տեղեկատվություն, որ եզդիներն ու քրդերը նույն ազգն են, ուղղակի տարբեր կրոնի են պատկանում: Ինչպես նաև արժեզրկում են կրոնը՝ անվանելով այն սատանայապաշտություն, եզդիների կրոնական ծեսերն անվանում են հետադիմական:

Մանկապարտեզն ունեցել է 51 շրջանավարտ, այժմ ունի 21 սան:

Ներկայումս գյուղի բնակիչներից 200-ից 120-ը հետևում է այդ աղանդին, և դա գյուղապետը չի հերքել: