Գերմանական Der Spiegel-ն անդրադարձ է կատարել Եգիպտոսի նախագահի այցելությանը Գերմանիա

Եգիպտոսի նախագահ Մուհամմեդ Մուրսին Գերմանիա կատարած պաշտոնական այցի շրջանակներում հանդիպել է կանցլեր Անգելա Մերկելի հետ. այցի ընթացքում նախագահը ստիպված է եղել բազմաթիվ քննադատություններ լսել, առաջին հերթին՝ կանցլերի կողմից, ով հիշեցրել է նրան լրագրողների առջև Մուհամմեդ Մուրսիի արած հակաիսրայելական հայտարարությունների մասին. գրում է գերմանական պարբերականը:

Մուհամմեդ Մուրսին երեկոյան հնարավորություն է ունեցել իր սեփական տեսակետը ներկայացնել և պարբերականին տված հարցազրույցում նշել է, որ Արևմուտքն արաբական բռնապետությունները տապալեց ահաբեկչության դեմ պայքարելու լոզունգի քողի տակ, ինչը, սակայն, անընդունելի է իրադարձությունների մյուս կողմում գտնվող մարդկանց համար:

«Եգիպտոսի և Գերմանիայի հարաբերութունները պետք է հետագայում իրավահավասարության հողի վրա զարգանան»,-նշել է Մուրսին: Երբ թերթի խմբագիրն անդրադարձել է այն հարցին, թե պատրաստվում է արդյոք նախագահը ներողություն խնդրել հրեաներին արնախում սիոնիստներ անվանելու մասին իր արած արտահայտության համար, Մուրսին նշել է, որ այդ հարցն ինքն արդեն այդ օրվա ընթացքում 5 անգամ լսել է, և չպատասխանելով՝ անդրադարձ է կատարել սեփական պետություն հիմնելու պաղեստինցիների իրավունքներին և Իսրայելի կողմից այդ իրավունքների ոտնահարումներին:

Ինչպես նշում է պարբերականը, նույն օրը կեսօրին, սակայն, Մուրսին բոլորովին այլ պահվածք է ցուցաբերել Անգելա Մերկելի հետ հանդիպման ընթացքում: Մերկելը նրան հիշեցրել է բոլոր այն սպասելիքների մասին, որոնք Գերմանիան ունի Եգիպտոսի ապագա քաղաքականությունից, այն է՝ ժողովրդավարություն, իրավահավասարություն, կրոնական ազատություն և հոգևոր ու աշխարհիկ կառավարության տարանջատում:

Մերկելը, սակայն, չի խոսել այն 240 մլն եվրոյի մասին, որը Գերմանիան խոստացել էր տրամադրել Եգիպտոսին: Խոսք չի գնացել անգամ համատեղ զարգացման ծրագրերի մասին: Մերկելը միայն նշել է, որ ինքը կարծում է, թե ժամանակն է, որ աշխատանքը, որը պետք էր անել, վերջապես արվի:

Հաշվի առնելով Եգիպտոսում տեղի ունեցող անկարգությունները՝ Մերկելը հիշեցրել է Մուրսիին, որ նորմալ տնտեսական զարգացումներն ապահովում են երկրի քաղաքական կայունությունը:

Իսկ ինչ վերաբերում է Եգիպտոսում Սուեզի ջրանցքի երկայնքով տեղակայված քաղաքներում բռկվող անկարգություններին, ապա դա վկայում է այն մասին, որ պետությունն աստիճանաբար կորցնում է իր լեգիտիմությունը. կարծում է Գիտություն և քաղաքականություն ֆոնդի՝ Եգիպտոսի հարցերով մասնագետ Ստեփան Ռոլը: Բնակչության մեծ մասը թերահավատությամբ է նայում պետությաքն վարած քաղաքականությանը: Երկիրը կանգնած է կաթվածի շեմին: Միակ լուծումն այստեղ փոխզիջումների գնալն է՝ և՛ կառավարության, և՛ ընդդիմության կողմից. եզրափակում է Ռոլը պարբերականին տված իր հարցազրույցը: