Վրաստանի ԱԳ նախարարը՝ Իվանիշվիլիի հայաստանյան այցի մասին

Վրաստանի վարչապետ Բիձինա Իվանիշվիլիի՝ Հայաստան կատարած այցի ժամանակ արված հայտարարությունները ոչ միանշանակակ գնահատականների առիթ դարձան Թբիլիսիում: Վրաստանի արտաքին գործերի նախարար Մայա Պանջիկիձեն Prime Time-ին տված էքսկլյուզիվ հարցազրույցում մասնավորապես խոսել է այն մասին, թե որքանով է հաջող Հայաստանի օրինակը Վրաստանի համար:

Անդրադառնալով Իվանիշվիլիի՝ Հայաստանում արված հայտարարությանը, և պատասխանելով հարցին՝ արդյոք Վրաստանը պետք է «բարի նախանձով» վերաբերվի Հայաստանին, Պանջիկիձեն մասնավորապես նշել է. «Դա ասվել է այն իմաստով, որ բոլոր երկրները պետք է հետաքրքրված լինեն միմյանց հետ լավ հարաբերություններ ունենալու մեջ: Ենթադրում եմ, որ լավ կլիներ, իհարկե, որ մենք ևս բոլորի հետ լավ հարաբերություններ ունենայինք: Մենք ձգտում ենք լավ հարաբերություններ ունենալ հարևանների հետ, և դա այդպես է՝ բացառությամբ Ռուսաստանի: Մենք լավ հարաբերություններ ունենք Միացյալ Նահագների հետ, Եվրոպայի երկրների: Մեր գլխավոր խնդիրը Ռուսաստանի հետ հարաբերություններն են»:

Պատասխանելով հարցին, թե որքանով Հայաստանը կարող է որպես լավ օրինակ ծառայել Ռուսաստանի հետ հարաբերությունների կարգավորման համար, Վրաստանի արտաքին գործերի նախարարը նշել է. «Ես այս հարցն այդքան չէի կոնկրետացնի, այլ կդիտարկեի ընդհանուր առմամբ և գլոբալ՝ որպես թեզիս, և դա այն թեզիսն է, որի մասին խոսել է պարոն Իվանիշվիլին, որ ցանկալի է լավ հարաբերություններ ունենալ բոլորի հետ»:

Խոսելով Հայաստանի՝ ՀԱՄԿ ռուսամետ ռազմական բլոկին անդամակցության և «ՀՀ-ն՝ ՌԴ-ի հետ» պայմանագրի մասին, որը նախատեսում է ռուսական ռազմական բազայի ներկայություն Գյումրի քաղաքում մինչև 2044 թվականը, և պատասխանելով հարցին՝ եթե Վրաստանը պետք է օրինակ վերցնի Հայաստանից, այս առումով չի հայտնվի արդյոք Վրաստանը նման վտանգի առջև, Պանջիկիձեն նշել է. «Ո՛չ, նման վտանգ չկա: Վարչապետը և կառավարության բոլոր անդամները բազմիցս նշել են, որ մեր ուղղությունը եվրոպականն է: Միակ միությունը, որին կմիանա Վրաստանը, Եվրոպական Միությունն է, միակ ռազմական քաղաքական դաշինքը՝ ՆԱՏՕ-ն»:

Խոսելով Իվանիշվիլիի հայաստանյան այցի ընթացքում կատարած հայտարարությանը Վրաստան-Ռուսաստան-Հայաստան երկաթուղու վերագործարկման մասին՝ Պանջիկիձեն ասել է. «Մենք պետք է պարզենք՝ անհրաժեշտ է մեզ արդյող նման երկաթուղի, ինչպիսին կլինի այն տնտեսական, քաղաքական օգուտը, որը կտա մեզ այդ երկաթուղին, որքանով այն կնպաստի Վրաստանի և Ռուսաստանի միջև հարաբերությունների բարելավմանը, որքանով կնպաստի հակամարտության կարգավորմանը, կայունությանը տարածաշրջանում»:

Պանջիկիձեն նաև ընդգծել է, որ այս թեմայով դեռ որևէ մեկի հետ բանակցություններ չեն վարում. «Ոչինչ որոշված չէ: Դա ուղղակի գաղափար է, թեմա, որի շուրջ քննարկումները կարևոր են, և ամեն ինչ ուսումնասիրելուց հետո միայն որոշում կկայացվի»: