Այս ֆիլմից հետո մարդիկ կցանկանան պատմագրություն կարդալ. Մազմանյանը՝ «Գարեգին Նժդեհ»-ի մասին

Երևանի թատրոնի և կինոյի պետական ինստիտուտի ռեկտորը, արձագանքելով «Գարեգին Նժդեհ» ֆիլմի շուրջ առկա քննադատություններին, այսօր լրագրողների հետ հանդիպման ընթացքում ասաց, որ դրանց առանձնապես մեծ ուշադրություն չպետք է դարձնել, քանի որ դրանք պրոֆեսիոնալների կարծիքներ չէին:

«Այդ քննադատությունների մեջ միանշանակ մեր մեջ եղած չկամությունն է: Դա մեզանում արատ է և մեծ խնդիր է, մեծագույն անտակտություն, էժանագին խոսակցություն ֆեյսբուքում: Ֆիլմը դեռ չդիտած՝ անլվա գլուխները սկսեցին քննադատել, բայց այդ դաշտը շատ լուրջ ընդունել չի կարելի: Սա պատմական դասագիրք չէ, սա գեղարվեստական ստեղծագործություն է»,-ասաց Արմեն Մազմանյանը:

Վերջինիս խոսքով՝ նախ, երբ նման խնդիր է քննարկվում, պետք է չափորոշիչներ լինեն, թե ինչ ժանրի մասին են խոսում: Որպես ժանր պատմական խռոնիկ չէ, չի կարելի խոսել պատմությունից պատմականորեն գեղարվեստական ստեղծագործությունում:

«Այսպես չի կարելի, նման կերպ արտահայտվել չի կարելի, սա անգրագիտություն է: Հերոսն ինձ հուզել է, համոզել է: Այս ֆիլմից հետո մարդկանց մոտ ցանկություն կառաջանա պատմագրություն կարդալ: Սա գեղարվեստական գործ է, ընկերնե՛ր, սրա համար չեն դատում»,- նշում է ռեժիսորը:

Հարցին, թե ֆիլմի նկարահանումները շատ կարճ են տևել, դա որակի վրա չի՞ ազդում, Արմեն Մազմանյանը պատասխանեց. «Մեր կինոգործիչները խորհրդային մտածելակերպ ունեն, հին են մտածում, չգիտեն, որ անգամ Լենինը մեռել է: Որպես մասնագետ՝ կարող եմ ասել՝ մեր շուկայում այս ժանրի արվեստ չունեինք՝ թափթփվածություն չկար, պրոֆեսիոնալ է նկարահանված: Ֆիլմն ինձ հուզել է: Մի տեխնիկական թերություն կա՝ ձայնի տեխնիկական մաքրություն է, ձայնը միատոնն է: Տա՛ Աստված, թերությունը միայն դա լինի»: