Եթե Սերժ Սարգսյանը խոսում է քաղաքացիական հասարակության մասին, ուրեմն պետք է զգուշանալ

«Մեր հիմնական գործառույթը թողած՝ քաղաքական օրակարգ ենք առաջ բերում, անում ենք այն, ինչ պետք է անեին քաղաքական ուժերը: Այս նախագահական ընտրությունները շատ ավելի ակտիվ շրջանի սկիզբ են ազդարարելու: Լուրջ խմորումներ, էներգիայի կուտակում են առաջացնում»: Այս մասին այսօր լրագրողների հետ հանդիպմանն ասաց «Ժամանակ» թերթի գլխավոր խմբագիր Արման Բաբաջանյանը:

Մենք խոսքի ազատություն ունենք, բայց այն լայն սպառում չունի, մենք չունենք դրան համարժեք պահանջարկ: Այս իմաստով սոցիալական մեդիաները մեծ դերակատարություն ունեցան: Մենք լրջորեն պետք է վերաբվերենք այն քաղաքական ուժերին, ովքեր տաքացրին քաղաքական կյանքը, բայց, ըստ էության, պարազիտի պես պահեցին՝ կուտակեցին իրենց էլեկտորատը, խոստումներ տվեցին, բայց, ըստ էության, այդ ամենն ի դերև ելավ: Եթե Սերժ Սարգսյանը խոսում է քաղաքացիական հասարակության մասին, ուրեմն պետք է զգուշանալ, քանի որ նրանք էլ կսկսեն խնդիրներ ունենալ»:

Ասուլիսի մյուս բանախոս, «Հրապարակ» օրաթերթի գլխավոր խմբագիր Արմինե Օհանյանի կարծիքով էլ այսքան պասիվ, այսքան միապաղաղ, այսքան ձանձրալի նախագահական ընտրություններ չեն եղել, ինչքան 2013-ին: «Ցավալի է, որ երկիրը հայտնվել է այս վիճակում, չկա մրցավազք, իսկ դա նշանակում է՝ քաղաքական կյանքը մեռած է: Հրահանգ եմ իջեցրել՝ որտեղ ինչ ծիլ, նախաձեռնություն տեսնում եք, պետք է օգնել, որպեսզի ոտքի կանգնի, որպեսզի նորի վրա մեր հույսը կապենք: Մենք զբաղված ենք ինքնամխիթարանքով»,-ասաց Արմինե Օհանյանը:

Վերջինիս խոսքով՝ «Հրապարակ»-ի նկատմամբ Խաչիկ Խաչիկյանի կողմից նույնպես ճնշում կա, և հիմա վերջինս դատը շահում է.  «Ա՛յ քեզ մամուլի ազատություն»: