Հյուսիսային Կորեայում պատերազմական դրություն է հայտարարվել

Հյուսիսային Կորեայի առաջնորդ Կիմ Չեն Ընը հանրապետությունում պատերազմական դրության և միջուկային զենքի փորձարկման նախապատրաստական աշխատանքների ավարտի մասին հրաման է ստորագրել:

«Երկիրը պատերազմական դրության մեջ է հունվարի 29-ի կեսգիշերից: Բոլոր սահմանամերձ ուժերը, ինչպես նաև երկրի կենտրոնական հատվածի զորքերը պետք է մարտական պատրաստության բերվեն», - գրում է հարավկորեական JoongAng Ilbo թերթը՝ հղում կատարելով սեփական աղբյուրներին:

Հիշեցնենք, որ պատերազմական դրությունը Հյուսիսային Կորեայում հայտարարվել էր դեռ 1993 թվականին, երբ երկրիրը դուրս էր եկել Միջուկային զենքի չտարածման մասին պայմանագրից: Միևնույն ժամանակ Հարավային Կորեայում և Պեկինում հայտնում են, որ միջուկային փորձարկումները կարող են տեղի ունենալ ավելի վաղ, քան ենթադրվում էր: Մի շարք մասնագետներ կարծում են, որ փորձարկումները կմեկնարկեն փետրվարի 16-ին՝ երկրի նախկին առաջնորդ Կիմ Չեն Իրի ծննդյան օրը: Տեղեկություն է շրջանառվում նաև առ այն, որ փորձարկումները կսկսվեն փետրվարի 25-ին՝ Հարավային Կորեայի նախագահ Պակ Կին Հեի երդմնակալության արարողության օրը:

Հիշեցնենք նաև, որ, ինչպես հաղորդում էր ВЗГЛЯД թերթը, Հյուսիսային Կորեայի իշխանությունները հունվարի 24-ին պաշտոնապես հայտարարել են միջուկային փորձարկումներ անցկացնելու մասին: Ընդ որում, Փյենհանը բացեիբաց հայտարարել էր, որ ծրագիրն ուղղված է Հյուսիսային Կորեայի թշնամու՝ ԱՄՆ-ի դեմ: