«Հրապարակ». «Ժողովրդավարական հայրենիք» կուսակցությունը բաժանվեց

Երեկ տեղի ունեցած «Ժողովրդավարական հայրենիք» կուսակցության քաղխորհրդի նիստը տևել է մոտ 3 ժամ, որն ընդմիջվել է կես ժամով, որովհետև քաղխորհրդի անդամներից մի քանիսն առաջարկել են՝ մինչև Պետրոս Գևորգյանին և Ղուկաս Մեհրաբյանին կուսակցությունից հեռացնելու որոշում կայացնելը, մեկ անգամ ևս խոսեն նրանց հետ. վերջիններս հրաժարվել էին մասնակցել քաղխորհրդի նիստին: Բանակցություններ վարելու առաքելությունը կրկին իրականացրել է կուսակցության փոխնախագահ Կառլեն Ալեքսանյանը: Մոտ կես ժամ տևած հեռախոսազրույցից հետո, ինչպես տեղեկացրեց ԺՀԿ «Հրապարակի» աղբյուրը, այդպես էլ որևէ հայտարարի չեն եկել:

Ղուկաս Մեհրաբյանն ասել է. «Մենք ձեզ հետ խոսելու ոչինչ չունենք, մենք փորձում ենք հարցը լուծել իրավական հարթությունում»: Ինչն էլ ԺՀԿ-ում ընկալել են որպես նոր ԺՀԿ ստեղծելու ակնարկ, ինչպես վարվեցին ՍԴՀԿ-ի հետ:

Այնուհետև քաղխորհուրդը շարունակել է իր աշխատանքը, քվեարկության է դրվել Մեհրաբյանի և Գևորգյանի հեռացման հարցը: Քաղխորհրդին 19 հոգուց (3-ը վերջին երկու տարում սառեցրել են իրենց անդամությունը կուսակցությանը), այսինքն, դե ֆակտո 16 հոգուց մասնակցել են 13-ը, որոշմանը դեմ և ձեռնպահ քվեարկել են մեկական, կողմ՝ քաղխորհրդի 11 անդամ: