ԱԳՆ-ի «թագավորները»
Վերլուծական
Անցնում եմ Հանրապետության հրապարակով՝ արտգործնախարարության շենքի մոտով, երբ դիմացս են դուրս գալիս երկու երիտասարդ. ակնհայտ էր՝ ԱԳՆ-ի դիմաց կայանված մեքենաներից էին իջնում ու հանկարծ լսում եմ, որ հազիվ մի 40 տարեկան, կոկիկ, գեղեցիկ վերարկու հագած երիտասարդը դիմում է ավելի երիտասարդ տղային, որը կենտրոնացած էր հեռախոսի վրա.
- Շա՞տ ես իշմար տալու:
- Չէ՛, արևս,- պատասխանում է երիտասարդ տղան՝ երիտասարդ տղամարդուն. ուշադրությունս գրավողը հենց «արև»-ն էր: Շարունակում եմ քայլել, արդեն թիկունքով եմ, երբ նրանց միանում են էլի մի քանիսը և կարծես որպես ողջույն՝ լսվում է.
- Թագավո՜ր…
- Ախպերըըըըը՜ս…
Ակամայից շրջվում եմ ու տեսնում, որ խումբը պատրաստվում է մտնել արտգործնախարարության շենք:
- Դուք ԱԳՆ աշխատողներ ե՞ք,- չեմ դիմանում արդեն ու հարցնում:
- Հա, ի՞նչ կա, որ…
- Դե, հեչ… թագավո՜ր, ախպե՜րս…
- Մենք վարորդներ ենք,- փորձում է արագ պարզաբանել ավելի տարիքով մեկը՝ հասկանալի դարձնելու լեքսիկոնային առանձնահատկությունների տրամաբանությունն ու ծագումնաբանությունը:
Ստանիսլավսկին ասում էր՝ «թատրոնը սկսվում է հանդերձարանից»: ՀՀ ԱԳՆ-ն, ամենայն հավանականությամբ, սկսվում է «թագավոր-ախպեր» վարորդներից: Վարորդները, ինչպես հայտնի է, շատ հաճախ բավական մեծ դերակատարում են ունենում (նախկին պաշտպանության նախարար Սերժ Սարգսյանի վարորդը՝ Վաչիկ Ղազարյանը, ով նախկինում անգամ շեֆի հետ ռեստորան չէր մտնում, այլ ժամերով սպասում էր մեքենայի մեջ, մինչև Սարգսյանը կավարտի իր հանդիպումը, այսօր դարձել է Հայաստանի ամենաազդեցիկ և հարց լուծող մարդկանցից մեկը՝ միանգամից բարձրացվելով գեներալի ու նախագահի թիկնազորի պետի աստիճանի): Նրանք ուղեկցում են շեֆերին, անձամբ ամենատարբեր հանձնարարություններով ուղարկվում են ամենատարբեր ատյաններ, շփվում շեֆերի գործընկերների հետ՝ թե՛ պաշտոնական, թե՛ անձնական մակարդակով: Այնպես որ, հարկավոր է ընդամենը երևակայել ու պատկերացնել, թե մեր ԱԳՆ-ի «թագավոր-ախպերները» ինչպիսի՜ տպավորություն թողած կլինեն դիվանագիտական առաքելությունների ներկայացուցիչների վրա, որոնցից շատերը փայլուն տիրապետում են հայերենին (Հայաստան եկող դեսպանների առաջին գործը հայերեն սովորելն է լինում, ինչը շատ հաճախ նրանք բավական հմտորեն թաքցնում են) և ավելի քան լավ հասկացած կլինեն «թագավոր-ախպերների» մակարդակն ու շփման կուլտուրան:
Լուսինե Կեսոյան
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
