Նոր համերգաշրջան` Բեռնդ Գլեմզերի մասնակցությամբ

Աշխարհահռչակ դաշնակահար Բեռնդ Գլեմզերի և Իսպանիայից ժամանած պիկոլո ֆլեյտահարուհի Սառա Կարմեն Ուռենյա Կաբրերայի մասնակցությամբ՝ ս./թ. փետրվարի 1-ին, ժամը 19:00-ին, Արամ Խաչատրյան համերգասրահում կմեկնարկի Հայաստանի պետական ֆիլհարմոնիկ նվագախմբի 2012-2013 թթ. համերգաշրջանի երկրորդ մասը:

Հայաստանի պետական ֆիլհարմոնիկ նվագախումբը 2013 թ. համերգաշրջանի ծրագրում ներառել է Բրուկների 3, 4, 7, 8, 9 սիմֆոնիաները: Տարին հիշարժան կդառնա նաև մեծանուն կոմպոզիտորներ Վագների և Վերդիի հոբելյաններով:

Հունվարի սկզբին ՀՊՖՆ-ի կազմը համալրել է Հայաստան ժամանած պիկոլո ֆլեյտահարուհի Սառա Ուռենյան: Նախորդ տարվա սեպտեմբերից ՀՊՖՆ-ում աշխատող իսպանացի գալարափողահար Էնրիկ Կամարասա Սիֆրեսն իր մասնագիտական փայլուն գիտելիքներով վարպետության դասընթացներ կանցկացնի հայ երիտասարդ երաժիշտների համար:

2013 թ. առաջին համերգին կհնչեն Շոստակովիչի 10-րդ սիմֆոնիան և Ռախմանինովի Դաշնամուրի 3-րդ կոնցերտը: Որպես մենակատար հանդես կգա գերմանացի աշխարհահռչակ դաշնակահար Բեռնդ Գլեմզերը:

Ռուս հայտնի դաշնակահար և մանկավարժ Վիտալի Մարգուլիսի սան Բերնդ Գլեմզերը 1981 թ. մասնակցել է 17 միջազգային մրցույթների, այդ թվում' Կորտոյի, Ռուբին­շտեյնի, Չայկովսկու, Բուզոնիի, Կալասի անվան: Դաշնակահարը ձայնագրություններ է կատարել «KOCH», «SONY», «NAXOS» ֆիրմաներում: Թողարկվել են CD-ներ' Շումանի սոնատների, Չայկովսկու և Ռախմանինովի բոլոր կոնցերտների, Սկրյաբինի և Պրոկոֆևի բոլոր սոնատների ձայնագրությամբ: ARD հեռուստաընկերությունը նկարահանել է Գլեմզերին նվիրված վավերագրական կինոնկար: Դաշնակահարը մասնակցել է աշխարհի հեղինակավոր փառատոների` հայտնի դիրիժորների ղեկավարությամբ և հյուրախաղերով հանդես եկել բազմաթիվ երկրներում: 1992 թ. Բեռնդ Գլեմզերն արժանացել է «European Andor Foldes», իսկ 1993 թ. «European Pianists» մրցանակներին: 2003 թ. Գերմանիայի նախագահը Գլեմզերին շնորհել է «Federal Service» շքանշանը: