Համագործակցության ստորագրված ծրագիր՝ Ուկրաինայի և ՀՀ մշակույթի նախարարությունների միջև

Այսօր, ՀՀ մշակույթի նախարարությունում ստորագրվել է «Ուկրաինայի մշակույթի նախարարության և Հայաստանի Հանրապետության մշակույթի նախարարության միջև 2013-2017 թթ. համագործակցության մասին» ծրագիրը:

Փաստաթուղթը ստորագրել են ՀՀ մշակույթի նախարար Հասմիկ Պողոսյանը և ՀՀ-ում Ուկրաինայի արտակարգ և լիազոր դեսպան Իվան Կուխտան:

Ծրագրի համաձայն կողմերը կաջակցեն ստեղծագործական կոլեկտիվների և անհատ կատարողների փոխանակումներին, մասնակցությանը երկու երկրներում անցկացվող միջազգային փառատոներին և մրցույթներին, կստեղծեն բարենպաստ պայմաններ կերպարվեստի, կինեմատոգրաֆիայի, գրադարանային և թանգարանային գործի, պատմամշակութային ժառանգության օբյեկտների, ժողովրդական արհեստների պահպանման բնագավառում համագործակցության զարգացման համար: Կողմերը կաջակցեն համատեղ նախագծերի. կինոյի, թատրոնի, գրականության ոլորտներում, ակտիվորեն կմասնակցեն երկու երկրների համար նշանակալից համարվող իրադարձություններին և միջոցառումներին: Փոխադարձության հիման վրա կկազմակերպվեն մշակույթի, կինոյի օրեր, կիրականացվեն ցուցահանդեսների փոխանակումներ:

Հայաստանի Հանրապետության և Ուկրաինայի միջև մշակութային համագործակցության մեկնարկը տրվել է 1996 թվականին' «Հայաստանի Հանրապետության կառավարության և Ուկրաինայի կառավարության միջև մշակութային համագործակցության մասին» ստորագրված միջկառավարական համաձայնագրով: Հետագայում այն հիմք է հանդիսացել երկու երկրների միջև մշակույթի ոլորտում համագործակցության զարգացմանը:

Ստորագրված փաստաթղթերի շրջանակներում իրականացվել են համատեղ միջոցառումներ, մշակույթի և արվեստի բնագավառի անհատ կատարողների և ստեղծագործական խմբերի փոխանակումներ, ճարտարապետական հուշարձանների վերականգնման աշխատանքներ, ինչպես նաև ապահովվել է հայաստանյան ներկայացուցիչների մասնակցությունը Ուկրաինայում կազմակերպվող մրցույթներին, փառատոներին և հակառակը:

Հայ-ուկրաինական մշակութային համագործակցությունն առավել ակտիվացել է 2010-2012 թվականներին, որի ընթացքում 2011 թ. հունիսի 30-ից հուլիսի 5-ը Հայաստանի Հանրապետության Նախագահ Սերժ Սարգսյանի Ուկրաինա կատարած պաշտոնական այցին զուգընթաց' հայ-ուկրաինական մշակութային համագործակցության շրջանակներում Ուկրաինայում կայացել են Հայաստանի մշակույթի օրեր: 2012 թ. մարտի 21-28-ը փոխադարձաբար Հայաստանում անցկացվել են Ուկրաինայի մշակույթի օրեր:

2012 թ. ապրիլի 21-23-ը ՀՀ մշակույթի նախարար Հ. Պողոսյանի հրավերով Հայաստան է ժամանել Ուկրաինայի մշակույթի նախարարության պատվիրակությունը' մասնակցելու Հայ գրատպության 500-ամյակի տոնակատարությունների շրջանակներում ՅՈՒՆԵՍԿՕ-ի կողմից հռչակված «Երևանը' 2012 թվականի Գրքի համաշխարհային մայրաքաղաք» լայնածավալ միջոցառումների հանդիսավոր բացման արարողությանը և նույն ժամկետներում Հայաստանում կայացած ԱՊՀ մասնակից պետությունների մշակութային համագործակցության խորհրդի /ՄՀԽ/ համատեղ նիստին:

Վերջին տարիներին ակտիվացել է համագործակցությունը գրական-թարգմանական ոլորտում, այս համատեքստում Հայաստանում պետպատվերով տպագրվել է Միրոն Նեստերչուկի «Պոեզիա Արմենիի» գիրքը, որում ներառված են հայ ժողովրդական, միջնադարյան, դասական և ժամանակակից գրողների բանաստաղծությունների ուկրաիներեն թարգմանությունները: 2012 թ. ապրիլին Կիևում Մաքսիմ Ռիլսկիի անվան գրական թանգարանում կայացել է ուկրաինական «Վսեսվիտ» ամսագրի հատուկ համարի շնորհանդեսը, որն ամբողջապես նվիրված է հայ գրականությանը, մշակույթին և պատմությանը: Միջոցառմանը ներկա էին հայկական սփյուռքի ներկայացուցիչներ, գրողներ, լրագրողներ: 2012 թ. հոկտեմբերի 2-ին Ուկրաինայի ԳԱԱ փոքր սրահում կայացել է ուկրաինացի գիտնական, հայագետ Իրինա Գայուկի «Ուկրաինայում հայկական մշակույթի պատկերազարդ հանրագիտարան» գրքի շնորհանդեսը: Հանրագիտարանը գրվել է Ուկրաինայի 44 պետական թանգարանների և արգելոցների ֆոնդերի նյութերի հիման վրա, տեքստերն ուղեկցվում են ավելի քան 500 նկարներով:
Ս. թ. փետրվարի 1-ին, ժամը 11:00-ին ՀՀ մշակույթի նախարարությունում «Ուկրաինայի մշակույթի նախարարության և Հայաստանի Հանրապետության մշակույթի նախարարության միջև 2013-2017 թթ. համագործակցության մասին» ծրագրի ստորագրմանը ներկա էին Ս. Փարաջանովի տուն-թանգարանի տնօրեն Զավեն Սարգսյանը, Ազգային թատերական միավորման նախագահ Արա Խզմալյանը, Հայաստանի «Ազգային կինոկենտրոն» ՊՈԱԿ-ի տնօրեն Գևորգ Գևորգյանը: