«Շանգրիլայի» լիցենզիան կչեղարկվի. Գագիկ Ծառուկյանին ունեզրկման գործընթաց է սկսել

Euromedia24-ի տեղեկթյուններով՝ Նիկոլ Փաշինյանի ուղիղ հրահանգով Գագիկ Ծառուկյանին պատկանող բիզնեսների նկատմամբ ճնշումների գործընթացը շարունակվում է։ «Արարատցեմենտ»-ից և Ծաղկաձորի ճոպանուղուց հետո իշխանությունները պատրաստվում են չեղարկել նաև Ծառուկյանին պատկանող խաղատների՝ այդ թվում «Շանգրիլա»-ի լիցենզիաները։

Հիշեցնենք, որ նախընտրական քարոզարշավի ընթացքում Նիկոլ Փաշինյանը բազմիցս սպառնացել էր Գագիկ Ծառուկյանին՝ հայտարարելով, որ նրան «նստացնելու» և ունեզրկելու է։ ԲՀԿ-ի ներկայացուցիչների համոզմամբ՝ ընտրություններում կուսակցության ձայները «գողանալուց» և նրանց Ազգային ժողով չթողնելուց հետո իշխանությունն այժմ անցել է գործնական քայլերի։

Օրեր առաջ հայտնի դարձավ, որ պետությունը հետ է վերցնում Ծաղկաձորի ճոպանուղու տարածքը, որը տնօրինում էր Գագիկ Ծառուկյանի գլխավորած Հայաստանի ազգային օլիմպիական կոմիտեն (ՀԱՕԿ)։

Վարչական դատարանն անվավեր է ճանաչել Կոտայքի մարզի Ծաղկաձոր քաղաքում գտնվող ճոպանուղու տարածքի՝ 225,1 հեկտար մակերեսով և 36 միլիարդ 413 միլիոն 526 հազար դրամ արժեքով պետական սեփականություն հանդիսացող հողամասի նկատմամբ ՀԱՕԿ-ի սեփականության իրավունքի պետական գրանցումը։ Այսպիսով, դատարանը բավարարել է Գլխավոր դատախազության պետական շահերի պաշտպանության վարչության հայցը։ ՀԱՕԿ-ի տնօրենը «Բարգավաճ Հայաստան» կուսակցության առաջնորդ Գագիկ Ծառուկյանն է։

Երեկ էլ հայտնի դարձավ, որ Դատախազությունը հայցադիմում է ներկայացրել Վարչական դատարան՝ «Արարատցեմենտ» ընկերությանը պատկանող «Ոսկե բանալի» առողջարանի սեփականության իրավունքի պետական գրանցումն առոչինչ ճանաչելու պահանջով։

Գերատեսչության տարածած հաղորդագրության համաձայն՝ 2003 թվականի հունվարի 9-ին վարչապետի որոշմամբ ՀՀ պետական գույքի կառավարման նախարարին թույլատրվել էր Արարատ քաղաքի Շահումյան 5 հասցեում գտնվող՝ 44 միլիոն 390 հազար դրամ արժեքով «Ոսկե բանալի» պրոֆիլակտորիան վաճառել մրցույթով՝ որպես նվազագույն գին սահմանելով 6 միլիոն 500 հազար դրամը։

Հայտարարված մրցույթում հաղթող է ճանաչվել «Արարատցեմենտ» ՓԲԸ-ն։ Ընկերությունը 2003 թվականի օգոստոսի 15-ին կնքված պայմանագրով պարտավորվել էր երկու տարվա ընթացքում կատարել 30 հազար ԱՄՆ դոլարի ներդրում և ստեղծել 30 աշխատատեղ։

Մեր տեղեկություններով՝ Գագիկ Ծառուկյանի ունեզրկման գործընթացը շարունակվելու է, և առաջիկայում պետությունը պատրաստվում է չեղարկել նրան պատկանող «Շանգրիլա» և այլ խաղատների գործունեության լիցենզիաները։