Հայկ Կասպարով. «Ես վիրավորված չեմ, ես այստեղ անելիք չունեմ»

Հայկ Կասպարովը մոտ ժամանակներս պատրաստվում է ընդմիշտ հեռանալ Հայաստանից: ArmStar.am-ը զրուցել է երգչի հետ ու պարզել շատ հարցերի պատասխաններ:

-Հա՛յկ, ամիսներ առաջ Հայաստանից մեկնելու ժամանակ հարցազրույցներից մեկում ասել էիք, որ վիրավորված եք մեր հասարակությունից և հույս ունեք, որ երբեք չեք վերադառնա. ինչո՞վ էր պայմանավորված Ձեր վերադարձը:

-Չեմ ասել, թե վիրավորված եմ, ուղակի ասել եմ, որ անելիք չունեմ այստեղ:

Յուրաքանչյուր մարդ ունի իր երաժշտական ճաշակը: Այս կամ այն երգը սիրել, չսիրելու իր ցանկությունը: Մեր հասարակության մեծ մասը սիրում է այն երաժշտությունը, որը ես չեմ երգում, իսկ ես չեմ ուզում անել մի բան, ինչը հասարակությանն այդքան էլ չի հետաքրքրում:
Ստեղծվում են լայն մասսանների ճաշակով շատ երգեր, դրանց կատարողները սիրվում են. ես նրանց մեջ չեմ մտնում, ու դա ինձ չի վիրավորում:

Եկել եմ փաստաթղթերիս հարցերը վերջնական լուծելու համար, որպեսզի այստեղից գնամ որպես Գերմանիայի քաղաքացիություն ունեցող մարդ:

-Մենա՞կ եք եկել:

-Նախ մենակ էի վերադարձել, ապա ինձ միացավ կինս, բայց դասերի պատճառով նա ստիպված էր շուտ գնալ:

-Ո՞ր երկրում եք բնակվում Ձեր կնոջ հետ և ինչո՞վ եք այնտեղ զբաղվում:

-Գերմանիայի Շվերին քաղաքում: Կինս սովորում է, իսկ ես դեռ ոչնչով չեմ կարող զբաղվել: Բարդություններից խուսափելու համար չեմ ուզում անօրինական որևէ գործ անել: Երբ վերջնականապես այնտեղ հաստատվեմ, հիմնական մասնագիտությամբ կիբեռնետիկ եմ, կփորձեմ այդ ասպարեզում ինձ դրսևորել, իհարկե, չեմ մոռանա երգելու մասին, սակայն առաջիկա մեկ տարին դեռևս կզբաղվեմ ընտանեկան գործերով և իմ հետագայի մասին մտածելով:

-Այս ամիսների ընթացքում, կարծում եմ հետաքրքրվել եք այնտեղի շոու-բիզնեսով, Ձեր գործունեությունն այնտեղ պատկերացնում եք:

-Պատկերացնում եմ: Անգամ պատկերացնում եմ ինձ այնտեղ մի քիչ ավելի պետքական, քան Հայաստանում: Այնտեղի շոու բիզնեսը լավն է, կան լավ կատարողներ, ինչպես բոլոր երկրներում: Կան շատ երաժշտական նախագծեր, ու երբ հեռուստացույցով դիտում ես դրանց փորձերը, քեզ թվում է, թե ինչ-որ շատ մեծ ու լուրջ միջազգային մրցույթի փորձեր են: Ամեն մի դետալի վրա աշխատում են գործից բան հասկացող պրոֆեսիոնալներ:-

Հայկ, ամիսներ առաջ Ձեր նշանադրությունը շատ լրատվամիջոցներ լուսաբանեցին, շնորհավորեցին, որոշներն էլ դա չարեցին՝ այն որակելով PR– քայլ: Ինչպես դա կմեկնաբանեք:

-Իմ ամուսնությանն անդրադարձած կայքերից միայն մեկին եմ ես շատ փոքրիկ հարցազրույց տվել: Մնացած կայքերն օգտվել են իմ ֆեյսբուքյան էջի լուսանկարներից և նյութ գրել դրանց հիման վրա: Այդ ընթացքում շատ նամակներ էի ստանում տարբեր լրատվամիջոցներից, որոնց չեմ պատասխանել, քանի որ դա իմ անձնականն էր, ու չէի ցանկանում, որ մեծ աղմուկ բարձրանա: Հատկապես, որ դա նշանադրություն էր, հարսանիքը տեղի կունենա ապրիլի վերջին:

Բոլոր այն մարդկանց, ովքեր մտածում են, որ դա PR– քայլ է, ասեմ, որ Գերմանիայում այդ հարցը շատ խստորեն է դրված: Այնտեղ շատ են կեղծ ամուսնությունները. գումար են վճարում ու ինչ-որ մեկի հետ ամուսնանում: Ուստի շատ մեծ հսկողություն կա: Ստուգվում է ամեն ինչ՝ սկսած ինտերնետային սոցկայքերից…

Երբ մենք գնացինք ԶԱԳՍ, իրենք մեր մասին ամեն ինչ արդեն գիտեին: Ընդհանրապես փաստաթղթերի ընդունումը շատ երկար է տևում, բայց մեր դեպքում բոլորը զարմացել էին, որ պատասխանները շատ արագ եկան:

-Փաստորեն դեռ չեք ամուսնացել. հետաքրքիր է, որ Ձեր սիրելիին «կինս» եք կոչում..

-Մենք միասին ենք ապրում: Բայց, քանի որ ես Գերմանիայում ապրելու իրավունք չունեմ, եկա այստեղ, որ ամեն ինչ լինի օրենքով. այսինքն ես Գերմանիայում պետք է օրենքով ամուսնանամ: Փաստաթղթերիս հետ ամեն ինչ կարգին է: Մնում է միայն, որ հանձնեմ գերմաներենի քննությունը:

-Փետրվարի՞ն եք վերջնականապես մեկնելու:

-Ոչ, կարծում եմ մարտի վերջին ամեն ինչ պարզ կլինի, և այդ ժամանակ էլ կմեկնեմ: Ճիշտն ասած ավելի շուտ պետք է մեկնեի, բայց մտածում էի՝ գուցե լինի Եվրատեսիլի նախընտրական փուլ: Տարբեր երկրներից մի շարք հեղինակներ ինձ համար երգեր էին ուղարկել, պատրաստ էին ամեն ինչ անել, միայն թե ես կատարեմ: Ուստի մտածում էի մասնակցել նախըտրական փուլին, իհարկե,նրանց առաջարկով: