Պարույր Հայրիկյանի վրա հարձակումը կարող է սպառնալ տարածաշրջանի կայունությանը. Reuters

Հայաստան 2 Փետրվար, 2013 10:24

«Հայաստանում նախագահի թեկնածու Պարույր Հայրիկյանի նկատմամբ մահափորձը կարող է հետաձգել այս ամսվա 18-ին սպասվող ընտրությունները և անկայուն վիճակ ստեղծել Կովկասում»,-այս մասին նշում է Reuters գործակալությունը:

Մահափորձի դրդապատճառը պարզ չէ, սակայն նախագահական ընտրությունները, որոնցում նախագահ Սերժ Սարգսյանը բոլոր հնարավորություններն ունի երկրորդ անգամ վերընտրվելու, ՀՀ սահմանադրության համաձայն՝ կարող է հետաձգվել երկու շաբաթով, եթե Հայրիկյանը չկարողանա մասնակցել դրանց:

Կայունությունը հետխորհրդային հանրապետությունում շատ կարևոր է ներդրողներին ներգրավելու և տնտեսությանը զարկ տալու համար, քանի որ երկիրը գտնվում է պատերազմական դրության մեջ հարևան Ադրբեջանի հետ և մեծ վնաս է կրել 2008-09 թվականների տնտեսական ճգնաժամի ժամանակ:

Նախագահի թեկնածուի վրա հարձակումը կարող է առաջացնել բռնությունների վտանգ, այնպես, ինչպես եղավ 2008 թվականի նախագահական ընտրությունների ժամանակ. այդ ժամանակ զոհվեց 10 մարդ:

Վիրահատությունից մի քանի ժամ անց Հայրիկյանը կասկած է հայտնել, որ այս հարձակման հետևում կարող է կանգնած է լինել օտար պետության գործակալություն, ամենայն հավանականությամբ, Ռուսաստանը, հատկապես՝ եթե հաշվի առնել, որ Հայաստանը վերջերս հայտարարել է իր՝ արևմտամետ քաղաքական ուղղության մասին:

Կովկասում անկայունության ամեն նշան անհանգստություն է առաջացնում ներդրողների մոտ: Չնայած այն հանգամանքին, որ Հայաստանը չունի իր սեփական գազուղիները կամ նավթուղիները, սակայն Թուրքիայից Եվրոպա գազուղիները անցնելու են Ադրբեջանով, որը լարված հարաբերություններ ունի Հայաստանի հետ: Ներդրողներն անհանգստացած են, որ տարածաշրջանում անկայունությունը կարող է բերել Լեռնային Ղարաբաղի պատերազմի վերսկսման: Մյուս կողմից էլ՝ փակված են մնում Թուրքիայի հետ սահմանները:

Ռուսաստանը ռազմական բազաներ ունի Հայաստանում, որը ՀԱՊԿ անդամ է: ԵԱՀԿ-ն իր անհանգստությունն էր հայտնել հինգշաբթի օրվա հարձակման կապակցությամբ: