Իշխանությունները պայքարում են ոչ թե ընդդիմության, այլ իրենց դեմ քվեարկած քաղաքացիների դեմ. Արման Աբովյան

«Բարգավաճ Հայաստան» կուսակցության ներկայացուցիչ Արման Աբովյանը հայտարարել է, որ Գագիկ Ծառուկյանի նկատմամբ իրականացվող գործընթացները քաղաքական բնույթ ունեն։

Նրա խոսքով՝ Ծառուկյանի մասնակցությամբ հայ-իրանական առևտրի կենտրոնի կառուցման նախագիծն իրականացվել է նաև Իրանի պետական աջակցության պայմաններում, իսկ գործընթացում ներգրավված է եղել նաև Իրանի դեսպանությունը։

«Մեղադրանքի բովանդակությունը կատարյալ անհեթեթություն է։ Իշխանությունները փորձում են ոչ միայն լռեցնել, այլև ջարդել ընդդիմությանը և ահաբեկել Գագիկ Ծառուկյանին, սակայն համոզված եմ՝ դա արդյունք չի տալու», - ասել է Աբովյանը։

Նա պնդել է, որ իշխանությունները պայքարում են ոչ թե ընդդիմադիր ուժերի, այլ այն քաղաքացիների դեմ, որոնք, իր խոսքով, ընտրություններում քվեարկել են իշխանության դեմ։

Անդրադառնալով Սահմանադրական դատարանի որոշմանը, որով ուժի մեջ է թողնվել ԿԸՀ-ի որոշումը և ԲՀԿ-ն չի ստացել պատգամավորական մանդատներ, Աբովյանը հայտարարել է, որ, իր գնահատմամբ, այդ որոշումը վնասել է ընտրությունների լեգիտիմությանը։

Խոսելով Գագիկ Ծառուկյանին պատկանող առանձնատնից կենդանիների, թռչունների, խրտվիլակների, ինչպես նաև երեք առյուծի և վագրի առգրավման մասին՝ Աբովյանը քննադատել է իրավապահների գործողությունները՝ դրանք անվանելով անհեթեթ։

«Ինչպե՞ս կարելի է լուրջ մեկնաբանել, երբ հրապարակային ցուցադրում են խրտվիլակներ ու կենդանիներ։ Եթե կա ապօրինի որսի փաստ, թող քննեն, բայց ամբողջ գործընթացը վերածվել է աբսուրդի», - նշել է նա։

Աբովյանը նաև ասել է, որ հույս ունի՝ դատարանը Գագիկ Ծառուկյանի գործով կկայացնի օրենքի գերակայությանը համապատասխան որոշում։

Քաղաքական գործիչը վերջում հայտարարել է, որ, իր կարծիքով, պետական ինստիտուտները չեն կատարում իրենց առաքելությունը, իսկ ներկայիս իշխանությունները «ինքնաապալեգիտիմացվել են»։ Նրա խոսքով՝ այսօր Հայաստանում «հայ լինելը վտանգավոր է»։