Ինքնաթիռը դուրս է եկել վայրէջքի գոտուց, կա 5 վիրավոր

Ռումինական օդանավը դուրս է եկել վայրէջքի գոտուց Հռոմի գլխավոր օդանավակայանում վայրէջք կատարելիս, որի պատճառով վիրավորվել է 5 մարդ: Այս մասին նշում է անգլիական Express պարբերականը` հղում կատարելով ավիացիոն գործակալության աղբյուրներին: 

ENAC իտալական ավիացիոն գործակալության պաշտոնյա Վիտալիանո Թուրան Sky TG24 TV հեռուստաալիքին տված հարցազրույցի ժամանակ նշել է, որ օդանավի  կազմի աշխատակցուհիները և ուղևորներից մեկը տեղափոխվել են հիվանդանոց:

Իտալական ANSA լրատվական գործակալությունը նշել է, որ վիրավորները ստացել են կոտրվածքներ, սակայն ոչ մեկի կյանքին վտանգ չի սպառնում:  Գործակալությունը նաև նշել է, որ Carpatair ավիոընկերությանը պատկանող ATR 72 ինքնաթիռը վայրէջքի գոտուց 50 մետր դուրս է եկել և հայտնվել խոտերի վրա: