Հայաստանում անցկացվում են Քուվեյթի մշակույթի օրեր

Հայ-քուվեյթյան մշակութային համագործակցության շրջանակներում 2013 թ. փետրվարի 3-10-ը Հայաստանում կանցկացվեն Քուվեյթի մշակույթի օրեր: Պատվիրակությունը ղեկավարում է մշակույթի, արվեստների և նամակագրության Ազգային խորհրդի գլխավոր քարտուղար Ալի Հուսեյն Ալյուհան, պատվիրակության կազմում ընդգրկված են շուրջ 40 հոգի:

Մշակույթի օրերն իրականացվում են «Հայաստանի Հանրապետության կառավարության և Քուվեյթի Պետության կառավարության միջև մշակութային համաձայնագրի 2011-2013 թթ. համագործակցության մասին» գործնական ծրագրի շրջանակներում:
Մշակույթի օրերի շրջանակում Երևանում և Գյումրիում նախատեսվում է Քուվեյթի պետական ազգային անսամբլի ելույթները, արաբական արվեստի ցուցահանդես /կերպարվեստ, լուսանկարչություն/, Քուվեյթի մասին պատմող վավերագրական ֆիլմի ցուցադրություն:
Քուվեյթի մշակույթի օրերի պաշտոնական բացումը տեղի կունենա 2013 թ. փետրվարի 6-ին, ժամը 15:00-ին, Հայաստանի ազգային պատկերասրահում՝ արաբական արվեստը ներկայացնող ցուցահանդեսի բացմամբ: Փետրվարի 6-ին, ժամը 19:00-ին Հ. Պարոնյանի անվան երաժշտական կոմեդիայի պետական թատրոնում կկայանա Քուվեյթի պետական ազգային անսամբլի ելույթը:

Հյուրախաղերը կշարունակվեն Գյումրիի կոնսերվատորիայում փետրվարի 7-ին, ժամը 16:00-ին:

Մշակույթի օրերի ընթացքում պատվիրակությունը կայցելի Հայաստանի պատմամշակութային վայրեր և մշակութային հաստատություններ: