«Արմենոիդս»-ի Էդգարը համագործակցել է “System of a down”-ի Շավոյի հետ

Հասարակություն 5 Փետրվար, 2013 1:18

«Արմենոիդս» խմբի համար տարեվերջն ու տաեսկիզբն աշխատանքային ու երաժշտական համագործակցությամբ է առանձնացել: 2012-ի դեկտեմբերի 20-ին «Արմենոիդս» խմբի Էդգարը կնոջ` մանեքենուհի Նադեժդա Հովհաննիսյանի հետ մեկնել էր ԱՄՆ: Հրավերը “System of a down” ռոք խմբի բաս-կիթառահար Շավո Օդադջյանի կողմից է եղել:

Էդգարը esyes.am-ին պատմեց իր և Շավոյի համագործակցության մասին՝ առաջինը մեզ վստահելով այս նորությունը: «Շավոյի հետ երկու գործիքավորում ենք կատարել մեր և նրա նոր ձայնասկավառակների համար: Այդ ամենն իրականացրել ենք նրա հիմնած էլեկտրոնային երաժշտական ստուդիայում, որտեղ հիմնականում էլեկտրոնային ստեղծագործություններ են գործիքավորվում»,- պատմեց Էդգարն ու հավելեց, որ այդ երգերը տեղ կգտնեն «Արմենոիդսի» նոր ձայնասկավառակում, որը, հավանաբար, կթողարկվի ամռանը: Այն կլինի էլեկտրոնային տարբերակով. «Նոր ձայնասկավառակը նոր նախագիծ է, որտեղ ընդգրկված կլինեն տարբեր ֆոլկլորային երգեր. ալբոմը նախատեսված է միջազգային շուկայի համար»: Այժմ Երևանում գտնվող Էդգարը նշեց, որ մոտ ապագայում դարձյալ մեկնելու է ԱՄՆ, որտեղ էլ շարունակվելու են ձայնասկավառակի մյուս երգերի աշխատանքները: Ինչ վերաբերում է Էդգարի՝ Հայաստան վերադառնալուն, այն պայմանավորված էր «Եղբայրներ» հեռուստասերիալի ավարտով, ինչպես նաև ստեղծագործական այլ աշխատանքներով:

Մինչ ԱՄՆ մեկնելը Էդգարը պատրաստվում է «Արմենոիդսի» հին երգերից որևէ մեկի հիման վրա տեսահոլովակ նկարահանել ու ներկայացնել հանդիսատեսին: Նա դժվարացավ պատասխանել արդյո՞ք համատեղ տեսահոլովակ կլինի նաև Շավոյի հետ. «Տեսահոլովակի մասին ոչինչ չեմ կարող ասել, քանի որ միջազգային շուկան այլ պահանջներ ունի: Հնարավոր է նաև, որ «Արմենոիդսը» մասնակցի “System of a down”-ի համերգային շրջագայություններին. գուցե տուռների ընթացքում հենց «Արմենոիդսը» կատարի բացումը»:

Նշենք, որ Էդգարն ու Շավոն ծանոթացել են դեռևս 2006 թվականին, երբ խումբը մեկնել էր ԱՄՆ՝ մասնակցելու Armenian Music Awards-ին: Այնուհետև նրանք պարբերաբար համագործակցել են:

Ի դեպ, Էդգարն ու կինը ԱՄՆ-ում նաև ամանորյա տոներն են նշել: Էդգարի խոսքերով` Նոր տարին չափազանց ուրախ և լավ մթնոլորտում են անցկացրել Շավոյենց տանը` նրա ընտանիքի հետ: Էդգարն առաջին անգամ չէր Միացյալ Նահանգներում, իսկ ահա Նադիայի համար այդ երկիրը նորություն էր, վերջինս այնտեղից դրական լիցքերով վերադարձել է:

Երաժշտի փոխանցմամբ, Շավոն ծանոթ է հայկական վերջին հումորային ֆիլմերին և նույնիսկ ցանկություն է հայտնել նկարահանվել նման մի ֆիլմում` եթե համապատասխան առաջարկ լինի:

Թեև Էդգարն այսուհետ ժամանակն ավելի շատ տրամադրելու է երաժշտությանը, չի բացառվում, որ նրան կրկին կտեսնենք էկրաններին՝ որպես դերասան. «Հեռուստատեսությունից չեմ հեռանա, քանի որ մեկ տարուց ավել դերասանական փորձ եմ ձեռք բերել: Սակայն որպես պրոֆեսիոնալ երաժիշտ չեմ կարող ասել, որ ինձ համար առաջնայինը դերասանական ոլորտն է. երաժշտությունն ավելի կարևոր է ինձ համար»: