Տատիի «տանձի՞ն ա», թե «բալը թանկ ա»

Մենք անդրադարձել էինք Մաշտոցի պողոտայում գտնվող «Կամելոտ» ռեստորանին, այնտեղ տիրող սանձարձակությանը, փորձել էինք հասկանալ ռեստորանատերերի անպատժելիության սինդրոմը և որոշ ենթադրություններ արել առ այն, թե հնարավոր հովանավորների դեր կարող էին կատարել նաև բարձրաստիճան այցելուները: Միաժամանակ ընդգծել էինք և այն, որ այցելուների մեջ կարող են գտնվել նաև այնպիսիք, որոնք գաղափար անգամ չունենան, որ իրենց անցկացրած լավ ժամանակը կազմակերպվում է շենքի բնակիչների նյարդերի հաշվին: Այսօր Ազգային ժողով էին եկել հիշյալ ռեստորանի մշտական հաճախորդներ Գալուստ Սահակյանն ու Մնացական Մնացականյանը՝ ռեստորանի տիրոջ՝ Նազարեթ Մնացականյանի եղբայրը: Հենց նրանցից էլ փորձեցինք որոշ ճշտումներ անել և ահա թե ինչ պարզվեց:

ԱԺ պատգամավոր, ՀՀԿ խմբակցության ղեկավար Գալուստ Սահակյան

- Պարոն Սահակյան, Դուք տեղյա՞կ եք, որ ձեր սիրելի «Կամելոտ» ռեստորանում ձայնամեկուսացում անցկացված չէ:

- Ի՞նչ անենք՝ անցկացված չէ:

- Դուք այնտեղ հաճախակի եք այցելում, այո՞:

- Դե հա, սուրճ խմելու, լավ, մեղմ երաժշտություն կա, ըտենց:

- Եվ տեղյակ չե՞ք, ասենք, որ մոտ երկու տարի է՝ այդ շենքի բնակիչներն այդ բոլոր ձայները լսում են:

- Է, թող լսեն…

- Նորմա՞լ եք դա համարում:

- Այսինքն՝ ի՞նչ ձայներ են լսում:

- Ռեստորանի բոլոր ձայները՝ աղմուկը, երաժշտությունը՝ մինչև գիշերվա ժամը 4-ը:

- Բայց ես ի՞նչ կապ ունեմ դրա հետ:

- Դուք կապ չունեք, ուղղակի գիտեմ, որ այցելում եք, ենթադրվում էր, որ հովանավորներ կունենան, որոնք թույլ են տալիս ռեստորանին՝ շարունակել գործել նման պայմաններում, կարողանում են քաղաքապետարանի և մյուս՝ խնդրի հետ գործ ունեցող մարմինների հետ հարցերը լուծել և շարունակել աղմկել:

- Եթե բնակիչները խնդիր ունեն, թող ինձ դիմեն, ես լուծումները կգտնեմ:

ԱԺ պատգամավոր Մնացական Մնացականյան

- Դուք տեղյա՞կ եք, որ Ձեր եղբորը պատկանող «Կամելոտ» ռեստորանում ձայնամեկուսացման աշխատանքները նորմալ չեն իրականացվել, ինչի պատճառով բնակիչներն անընդհատ բողոքում են:

- Ես ըտենց բաներից տեղյակ չեմ:

- Դուք այնտեղ այցելո՞ւմ եք:

- Իհարկե այցելում եմ:

- Իսկ ինչպիսի՞ մթնոլորտ է այնտեղ սովորաբար: Երաժշտությունը բարձր է՞:

- Ես չգիտեմ, ես երկար չեմ մնում: Ուղղակի այցելել եմ:

- Եվ երբևէ Ձեզ չե՞ն դիմել՝ ենթադրենք, բնակիչները բողոքած լինեն, քաղաքապետարանի հետ հարց լուծելու համար:

- Չէ, չէ, ես ըտենց բաներով չեմ զբաղվում, երբևէ նման խնդիր չեմ էլ լսել:

Լուսինե Կեսոյան