«168 ժամ». Ծառուկյանը խորհրդարան էր եկել՝ ԲՀԿ վերակողմնորոշումը լեգիտիմացնելու

Երեկ ԱԺ-ում մեծագույն իրադարձություն էր. ԲՀԿ ղեկավար Գագիկ Ծառուկյանը մեկ տարվա ընթացքում վերջապես մի 20 րոպե ժամանակ էր գտել ԱԺ գալու համար:

Հիշեցնենք, որ Ծառուկյանի թիմակիցներն ու մամուլի քարտուղարը ԱԺ նախորդ երկու նստաշրջաններին նրա բացակայությունը պայմանավորում էին այն հանգամանքով, որ Ծառուկյանը չափազանց կարևոր գործով է զբաղված: Չնայած պետք է նկատի ունենալ, որ Ծառուկյանի միակ և հիմնական գործն ԱԺ-ում է, քանի որ նա հաստիքացուցակով ԱԺ պատգամավոր է:

«168 ժամը» գրում է, որ այդ այցը նշանավոր էր ոչ միայն ֆորմալ, այլև բովանդակային իմաստով: Այն պահին, երբ Ծառուկյանը հայտարարեց, որ ինքը չի մասնակցում նախագահական ընտրություններին, իսկ ԲՀԿ-ն չի սատարելու թեկնածուներից որևէ մեկին, կարելի էր միայն գուշակել, թե քաղաքական դաշտի որ կողմում է լինելու Ծառուկյանը: Երեկ գալով խորհրդարան՝ նա տվեց նաև այդ հարցի պատասխանը: Խնդիրը միայն այն չէ, որ ԲՀԿ խմբակցության ղեկավարը խորհրդարանի դահլիճը լքեց ՀՀԿ խմբակցության ղեկավար Գալուստ Սահակյանի ընկերակցությամբ, և այն էլ՝ ԱԺ նախագահի համար նախատեսված մուտքով: Երեկ տեղի ունեցավ առաջին հայացքից ոչ այնքան կարևոր թվացող մի քվեարկություն, որը բացահայտեց, թե քաղաքական դաշտի որ հատվածում է իրեն պատկերացնում ԲՀԿ-ն:

«Ժառանգություն» խմբակցության պատգամավորներ Ռուբիկ Հակոբյանը, Զարուհի Փոստանջյանը և Թևան Պողոսյանը ներկայացրել էին որոշման մի նախագիծ, որով առաջարկում էին ստեղծել ԱԺ ժամանակավոր հանձնաժողով՝ Թեղուտի պղնձամոլիբդենային հանքավայրի շահագործման թույլտվության օրինականության վերաբերյալ ուսումնասիրություն իրականացնելու միջոցով ՀՀ ԱԺ-ին եզրակացություն ներկայացնելու համար: Այս որոշման նախագիծը գլխադասային Բնապահպանության հարցերի հանձնաժողովում չէր ստացել բացասական եզրակացություն, և, որպեսզի այն մտներ ԱԺ օրակարգ, խորհրդարանը պետք է իր քվեարկությամբ դրա մասին որոշում կայացներ:

Երբ հարցը դրվեց քվեարկության, այն ստացավ 16 կողմ և 64 դեմ ձայն: Խորհրդարանական երեք ընդդիմադիր խմբակցությունների՝ ՀԱԿ-ի, ՀՅԴ-ի և «Ժառանգության» ներկայացուցիչները կողմ էին քվեարկել, իսկ ՀՀԿ և ՕԵԿ ներկայացուցիչները՝ դեմ: Իսկ ի՞նչ էին արել ԲՀԿ ներկայացուցիչները՝ նրանք չէին մասնակցել քվեարկությանը, բոյկոտել էին քվեարկությունը:

Առաջին հայացքից թվում է, որ տեղի ունեցածի մեջ ոչ մի արտառոց բան չկա, ԲՀԿ-ն երբեք էլ չի հայտարարել, որ ինքն ընդդիմություն է կամ իշխանություն, այլ հանդես է եկել որպես այլընտրանք և այս քվեարկության ժամանակ էլ չի պաշտպանել ո՛չ ընդդիմությանը, ո՛չ իշխանությանը: Բայց պետք է նկատի ունենալ, որ երբ քննարկվում էր Մարտի 1-ի դեպքերն ուսումնասիրող հանձնաժողով ստեղծելու հարցը, ԲՀԿ-ն հստակ հայտարարում էր, որ իրենք կողմ են ընդդիմության այդ առաջարկին և նույնիսկ իրենց խմբակցության անդամ պատգամավորին վիրահատությունից էին հետ բերում, իսկ մեկ այլ պատգամավորի Մոսկվայում «տրապի տակից» էին հետ վերադարձնում Երևան: ԲՀԿ-ն ընդդիմության նման դեմ էր քվեարկում բյուջեին ու կառավարության մյուս նախաձեռնություններին: Բայց դա մինչև այն պահը, երբ ԲՀԿ-ն կորոշեր, որ չի մասնակցում նախագահական ընտրություններին: Դրանից հետո ԲՀԿ-ն վերակողմնորոշվել է:

Դրա ապացույցը երեկվա ԲՀԿ-ի բոյկոտն էր, որը նույնն է, ինչ ՀՀԿ-ի կամ ՕԵԿ-ի դեմ քվեարկելը: «Ժառանգություն» խմբակցության պատգամավորների կողմից ներկայացված որոշման նախագիծն օրակարգ մտցնելու համար պետք էին կողմ ձայներ: Իսկ թե դրա ընդունմանը դեմ արտահայտվողները դեմ էին քվեարկում, թե բոյկոտում էին քվեարկությունը, որևէ նշանակություն չունի, դրանից կողմ ձայների քանակը չէր ավելանում:

Պետք է նկատի ունենալ մի հանգամանք ևս. ԲՀԿ-ն ՀՀԿ-ի տեսակետը պաշտպանեց մի այնպիսի հարցում, որն իր էությամբ քաղաքական չէր, այլ տնտեսական և էկոլոգիական էր: Բայց այն քաղաքական էր այլ առումով, այն պետք է ցույց տար՝ արդյոք ԲՀԿ-ն նախկինի նման շարունակելու է կողմ քվեարկել ընդդիմության նախագծերին, թե՝ անցնելու է իշխանության ՀՀԿ-ի և ՕԵԿ-ի կողմը:

Երեկվա քվեարկությունը ցույց տվեց, որ ԲՀԿ-ն վերակողմնորոշվել է, Ծառուկյանը խորհրդարան էր եկել այդ վերակողմնորոշման ակտին ներկա գտնվելու, իր ներկայությամբ այդ վերակողմնորոշումը լեգիտիմացնելու համար: Պատահական չէ, որ հենց այդ քվեարկությունից հետո Գալուստ Սահակյանն ընկերակցեց նրան: